Aizawl: Tuirial bial MLA bye-election neih hun a hnai zel a, campaign boruak pawh a sang chho zel a, Election Department-in dan kengkawh tura a tih, Flying Squad Team-ten ngawrh taka khaw hrang hrang fang kualin, dan angin hma an la chho zel.
Flying Squad hian nimin khan Khamrang leh Mualkhang khuaa party hrang hrang campaign office-te an tlawh a, party mite chu Election Model Code of Conduct (MCC)-te hrilh hriain, vantlang hmuna party chhinchhiahna leh campaign-na thil – banner, poster leh flag tar an hmuh theih ang angte chu an la thla.
Flying Squad hian Tuirial bial chhung khaw hrang hrang an tlawh kual zel dawn a, tun kar chhoah pawh khaw hrang hrang tlawh tawhin, political party hrang hrangten MCC an bawhchhiatnate an fiah tawh a ni.
Mi mal, vantlang hmun leh vantlang thil, sorkar hmun leh sorkar thilah political party chhinchhiahna flag, banner leh poster ang chi reng reng tar leh dah phal a ni lo a; hetihlai hian mi mal thila party flag, banner leh poster ang chi tar chhuah dawn erawh chuan a neitute phalna ziakin an nei tur a ni a, commercial vehicle (campaign-na atana hman – Election Department-in phalna a pek bik ni lo)-ah te, private vehicle (star campaigner lirthei tiam lovin)-ah te lo chuan party chhinchhiahna flag, banner, poster hi tar phal a ni lo tiin; lirthei-a party flag tarte pawh lak thlaksak an ni.
Static Surveillance Team pawhin campaign office-te tlawh kualin MCC an hrilhfiah bakah dan bawhchhiatna awm theite titawp nghal turin an hrilh nghal a; campaigner-ten pawisa Rs 50,000 aia tam an kawl tih an hriata an hmuh chuan dan anga action an lak nghal tur thu leh an inbuatsaih nghal thu an sawi.
Hei bakah hian Video Surveillance Team te pawhin party-te chetvelna an thlithlai ve tan nghal a; an senso leh dan kalha an chetna te an chhinchhiahsak nghal a ni.