A lung an phum tha a, kum 60 a tlin hnuah pawh a la dam khaw chhuak : Zoramthanga


Mizo National Front (MNF) in nimin khan kum 60 an tlin champha an lawm a. He hunah MNF President Zoramthanga chuan India ramah political party ral tawh tam tak an awm thu sawiin, “MNF an din hi a lungphum an phum tha em a, kum 60 a tlin hnuah pawh harsatna chitin reng paltlangin, vawiin thlengin a la dam khaw chhuak,” a ti.
Vanapa Hall-a MNF party Diamond Jubilee lawmna inkhawmah MNF President Zoramthanga hian, Pathianin MNF hi kum 60 chhung a hum tih sawiin, “India rama political party zingah kum 60 tling an vang em em a. Congress pangngai leh BJP ngei pawh kum 60 an tling teuh lo. MNF erawh kan varparh hi eng zual zelin, a lungphum a tha em a vawiin hi kan thleng a ni,” tia sawiin, MNF in kum 60 paltlang tura dam khaw chhuak hrim hrim a nih loh thu leh a patlang hi a nei loh thu a sawi.
MNF President hian chanchin tha hril nghal thei turin India rama state pakhatah Pathianin Mizote hi a dah thu sawiin, “Pathian hian Mizo hnam hi eng emaw ti turin min duh a, min buatsaih a, lung a phum a, a din chhova, a hum a, a veng a, a hunah a chawimawiin, ka sawi duh. Chuvangin tunah chuan khawvelah mahni population ratio-ah chuan missionary tir tam ber kan ni,” tiin, MNF din hma pawhin he ram luah tur hian chhan neiin Pathianin he ramah hian Mizo te hi a dah niin a sawi.
“Pathian hian independent tir min duh se, Assam ringrek laiah China kha rawn chhuk ve sela a awl em em mai a. Mahse, Pathianin tul a ti rih tlat lo. Zoram hi independent-in awm rih suh tih hi Pathian duhdan a ni tlat,” tiin Zoramthanga hian a sawi a. “Midang pawhin independent in tuma in thei leh si lo an ti hi a dik. Mahse, Pathianin a awih tlat lo,” a ti bawk.
MNF sorkar hmasak chhung khan an chet theih dan tiamchin a tlem tih sawiin, “A chhan chu central-ah congress an sorkar vang a ni a. An chak si a. Tuirial Hydel Project cheng vcb. 300 vela a bul tan, nasa taka kan nawr a cheng vbc. 800 chuanga min punna, chumi chu Home Minister Raj patel-a’n a rawn puan tur pawh hetah tangoin Congress hruaitute’n ‘rawn puang suh’ an tih asvangin a zuih ral thak a. Kan sorkarna liam hnuah Tuirial Hydel Project pawh vawiina buai em em hian a zo ta a ni,” tiin, Mizoram leh central-a congress sorkarna kara MNF lo tla ve sorkar tan hnathawh tak tak a theih loh thu a sawi.
Kum 2008-a inthlan sorkar chak tawk intiin inthlan hmachhawn mah se; EVM vote chhiar awlzia hre chungin Saiha constituency pahnih chauh awmnaah zing dar 8-a vote chhiar kha chawhma chanvea bial hnih chu zawh ve tur a nih laiin zan dar 11 an thlen thu a sawi a. “Eng a ti nge kan tih chuan, Aizawl-a a control tute’n an la inpeih hmain Saihaah chhiar an awih lo. Champhaiah pawh chuti tho chu a ni,” a ti a. “Kum 2013 inthlanah VVPAT awm tawh mah se, hman theih miah loin Election Commission in guideline an siam a, VVPAT awmze nei lovin, EMV ngai bawk hman leh a ni a. Kan ziaawm hret a, MLA 5 kan nei a. 2013 leh 2018 inkar kha engti kawng pawha Congress an sorkar tura tih an ni,” a ti.
“Kum 2013 inthlanpuiah Congress an han sorkar leh chu hlauh nei tawh hek lo. Zu an zuar vut vut tawh mai a. Kohhran an manganga an tap a. Zoram mipui kan tap a, a za telin, a sang biin kan thi zawih zawih mai a ni. An thiltih theihzia chu an zu zawrh sawi mawi turin pastor thenkhatte pawh zu hmang thei a maw lem” tiin, hei erawh chu Congress an tlak theihna tur atana Pathian rorel a nih thu Zoramthanga hian a sawi.
Zoramthanga hian party thenkhatin kalphung thar, tih dan tharte an nei zing lutuk tih sawiin, “Kalphung tharte hi neih zin lutuk chi a ni lo. Sorkar te hi insorkar tir chhin chi a ni lo. A pawi tur ang a pawi hman ang. Tui anga nghet lote chu mipuite hian MLA 10 pawh an la pe lo. Mipuite hian mi nghet an sorkartir thin,” tiin, tui anga nghet lo ni lovin mi nghet an tlin thin thu a sawi a. “MNF pawh Pathian leh kan ram tan titute din, hriatnaah pawh thinlung thuthlunga nghehnaah nitina thang chho zelin, lungpui chunga in sak ang hi a ni a. ‘Kalphung thar thlak thlak an ni ve love, chuvangin kum 60 ka’n dinchhuah tir teh ang’ Pathianin a tihna chhan a ni zawk,” a ti bawk.
He hunah hian Tawnluia, Sr Vice President pawhin thu sawiin, MNF dinchhuaktu Hnam Pa Laldenga thinlung taka an hriat reng thu leh an chawimawi thu a sawi a. “Mizo Nationalism behchhana he party hi din a ni a. Zoram dinchhuahna tur hian he party hi mipuite pawhin min la ring a, rorelna min pe a ni. Mipuite beiseina tihlawhchham thiang kan ni lo a ni,” a ti a. “Hnam Martar tam takte Zoram tana an nunna hlantute vawiin hian kan hre reng a. Martar-te thinsena an bual party hi chuti maia tlu tur a ni lo,” tia sawiin, martar chhungte hriatreng leh ngaih pawimawh hi an tih tur a nih thu a sawi a ni.
Diamond jubilee lawmna hunah hian MNF dintu mi pariat-te hnenah chawimawina thuchei (Citation) hlan an ni a, martar-te zahna leh sunna atan ngawi rengin minute khat din a ni. Laldenga nupui Lalbiakdiki’n Jubilee cake a zai bawk a ni.
Diamond Jubilee lawmna hun hi Vanlalzawma, Vice President-in a kaihruai a. MNF Jubilee lawmna hun hi kum khat chhung (22.10.2021 atanga 22.10.2022) kawng hrang hranga hmang tura inbuatsaih a ni.

Leave a Reply

Your email address will not be published. Required fields are marked *

error: Content is protected !!