China lian zel hmachhawn turin Assam-ah ralthuam chhawp


Indian Army chuan China nena inrina, Line of Actual Control (LAC) hrula ram thenawmte inpawt hnai zel lo hmachhawn tur leh a tul huna che chhuak thei turin Assam-ah Pinaka leh Smerch Multiple Rocket Launcher Systems (MRLS) an chhawp.
An dahna hmuna battery commander Lieutenant Colonel Sarath chuan, “Pinaka weapon system hi India siam multi rocket launcher system niin Defence Research & Development Organisation (DRDO)-in an duan a ni a, tuipui zawl leh hmun sangah pawh km 38-a hlaa a tum a kap fuh thei,” tiin ANI a hrilh a. Ram venhimna atan a tangkai hle dawn tih a sawi.
Pinaka leh Smerch chhawp hnai chuan tha a tichak dawn tih sawiin, “A hunah tak rang takin kan che chhuak thei ang a, a hmanrua hi a dikin a hun takah, hun reilo te chhungin hmelma kan kap thei tawh dawn a ni,” a ti.
Smerch system hi India-in conventional rocket system a neih zingah chuan a kap hla thei ber niin km 90-a thui a kap thei a. Kah chhuahna pali a nei a, second 40 lek chhungin metre 1,200 bial chhungah rocket 48 a kap chhuak thei.
Pinaka weapon system hi rocket artillery system niin tuipui zawlah leh a aia sangah pawh km 38-a hla kap phak a ni a. Hmun sangah hian hnuai lampang kah nan pawh tangkai taka hman theih a ni.
Rocket kah chhuahna paruk nei niin second 44 lek chhungin metre 100 leh metre 800 bial chhunga mi fuh turin rocket 72 zet a kap chhuak hman.
A hming hi Hindu pathian, Lord Shiva thalmu hming chawia an phuah a ni nghe nghe a. Tunah hian hetiang tho hi a changkang zawk duan leh siam chhuah mek a ni a, hei phei chu hmun hla zawk kap thei tur a ni. Tuna Assam-a chhawp pawh hi ramri-a China lian zial tur do letna tur tha tak a ni ang.
Pinaka leh Smerch hi puak thei chi hrang hrang kah chhuah theih nana duan ve ve a ni a, hmun huam zau deuhva hmelma awmte kahna tur bik deuh atana duan a ni bawk.
Pinaka ammunition system bik hi tunah hian a chi thar, changkang leh tha zawk pawh siam chhuah mek a ni a, hei hi chu km 75-a hlaa mi kap pha tawh tur niin tuna mi aiin a tangkai leh zual dawn a ni.

Leave a Reply

Your email address will not be published. Required fields are marked *

error: Content is protected !!