EDITORIAL 23/10/21


Kawngpui tha nei tur kan ni tawh; sorkar che teh se!

Assembly house ah Mizoram kawngpui that vanga lawmna lam lo aupui tawh nimahse, tunah hian hmun thenkhatah chuan kawngpui chhia vangin khaw tam takin harsatna an tawk leh mek tawh a, tlawh pawh hleih theih loh khaw tam tak a awm leh tawh.
Kan sawi fo thin angin kawngpui tha hi chuan chetvelna leh hmasawnna engkim hi a keng tel a, ramri buaina vanga kan tawrh thin tam takah pawh hian kawngpui tha nei ila kan pumpelh theih tam tak a awm. Muangleia awm thei kan ni lo tih hi hriatreng a, tuna ngaihngama kan awm laite hian sum neih ang ang hmang pawha thawh chho zel hi hun tak a ni.
Tunah chhim thlang lam, Lunglei leh Tlabung inkar km 97-a thui kawngpui a chhe leh hle tawh a, hmun hrang hrangah lirthei tana zawh harsa tur khawpa kawng khuar te a awm bakah, km 97-a thuiah hian km 20 bawr vel chauh kawng pangngai a awm tawh nia thudawn a ni! He kawngpui chhawrtu hi sorkarin a pawm khaw 100 bawr vel an ni lehnghal a, tun dinhmunah chuan he kawngpui kaltlang hian khaw 100 bawr vel huam chhunga chengte chu an zin hlei thei tawh lo a, ei leh bar lak luh kawngah harsatna an tawk nasa hle tawh bawk.
Khaw 100 bawr vela mihring awm zat tur leh an khawsak buai phah nasat turzia pawh hi ngaihtuah tham tak a ni. Damdawiin te phei chuan hmunpui pan ngai ngei ngeite pawh kawngpui tha lo vangin an refer ngam lo te tih a la ni ta deuh deuh a, a nghawng natzia hi sorkar hian hre hram tawh teh se.
Eng sorkar ah pawh kawngpui tha kan nei hlei thei lo zel mai hi a ninawm tawh a, PWD hi chief minister ten an chan zel avang hian duh chuan hma la chak thei awm tak an ni bawk nen, chhuan lam tur eng eng emaw an la nei zel thung a; kan kawngpui hi chuan ngaihthah mai lova, ngaihsaktu a va ngai nasa tawh em. Ram mipuite pawh politics tuinu a buai lovin, a taka che ngam hruaitu nei turin i inbuatsaih thar ang u.

Leave a Reply

Your email address will not be published. Required fields are marked *

error: Content is protected !!