West Ham United in Europa League knockout stage-ah ke lehlam an hlangkai tawh tluk a ni a. Ningani zanah Genk lakah 3-0 a chakin Group H-ah dinhmun tha an luah.
David Moyes-a pawlte hian khelh thum atang hnehna chang vekin point rukin anmahni hnaih bertu Dinamo Zagreb lakah hma an hruai a. Group-a an elpui dangte hi an inhneh kual vek avangin Hammers chan a tha.
Hammers chhut a na
London Stadium-ah English club in ball an chang tam a, Moyes-a hnuaia kawng dik zawh chak tak mai team hi Belgian club in ven chawt an tum avangin first half-ah chance ngah lo mahse a chungnung zawkah an tang.
Halftime dawnah an mamawh goal an khung a. Craig Dawson chuan Aaron Cresswell ball cross a tauh lut a. He goal hian inkhel a ti inhawng zual.
Second half-ah Hammers in minute hnih chhungin goal hnih an khung a. Minute 57-naah Cresswell-a ball vawrh luh tha lutuk atang bawkin Issa Diop chuan an goal hnihna a tauh lut a. Jarrod Bowen chuan minute 58-naah dinglam atanga ball lalutin goal-ah a khung a. Genk goalkeeper Maarten Vandevoordt chuan a dansak lo ho angreng hle.
Hammers in goal an khung belh hnuah inrintawkna lian tak an nei a, Nikola Vlasic hmangin goal li-na an nei teuh hle a. Lehlamah erawh Genk in first half a Paul Onuachu in an ball cross luh uiawm taka a tauh luh loh goal hlauhawm mumal tak sawi tur an nei lo.
Europe-ah Hammers an danglam
Premier League-ah West Ham hi season liamta chawhnu lam khan che tha hle in parukna an ni pha a, tun season-ah pawh team lian berte tan pawha ngaihthah chi miah loh team zingah an tel a. Everton laka hnehna sualchhuak hlim niin Ningani zanah pawh team tha an nihna an lantir.
Genk lakah bul an tan tha lova, Theo Bongonda goal khung offside vanga pawm loh a ni a, season liamta a goal 35 khung striker Onuachu chet fuh loh zan a ni bawk. Mahse inkhel a reiin team pahnih inkar inthlau a langsar a, minute 57-na a an goal hnihna a luhin chak tur zawk chiang takin pakhat chauh an awm tawh.
Goal khungtu zing ami Jarrod Bowen chuan Europe-a an chetthat chungchang sawiin, “A pawimawh ber chu group a san ber a ni a, mahni mual a inkhel a chak ngei a pawimawh zual. Mikhual team nihin chetthat duh bawk mah ila hengahte hian a chetsual chi loh.”
“Hetiang zela kan kal theih chuan inrintawkna kan nei anga, team dangte pawh kan lakah an fimkhur zual hle ang.” a ti.
West Ham boss Moyes chuan, “First half-ah kan inthlau lo hle, mahse hma hruai kan phu in ka hria. Goal a lut zung zung kha kan tan a tha a, kha khan insiamremna hun min pe. Halftime dawna goal kan khung kha a pawimawh a. Goal thum a hma kan hruai vat kha a hnunglam kan thawmthat theih phah.” tiin inkhel a thlirlet.
Napoli an harh e
Napoli in Diego Armando Maradona Stadium-ah Polish club Legia Warsaw an mikhual a. Second half-ah goal thum khungin 3-0 in an chak.
Partenopei tan Lorenzo Insigne-a’n goal mawi a khung hnuah striker chetha Victor Osimhen-a’n tun season a a goal 9-na a khung a. Huntawp hma in Matteo Politano chuan goal khat a khung leh bawk.
Napoli head coach Luciano Spalletti chuan tun season a che tha tak Osimhen fakin, “Professional tak, mi fel tak leh inzir tum tak a ni a. A teammate-te ngainat a hlawh a, ani kan nei hi kan vannei hle. Attacking player tha kan neih avangin khelhdan kan ngah theih phah a, Osimhen, Mertens leh Insigne te a ruala kan khelhtir hian thil danglam bik a thleng fo thin.” tiin a sawi.