Inchei a ngaihna chhan chu maw..

Khawvel I biak dan a ni:
Mahni inhlut lo, mahni invawng fai lo I ni tih khawvel I hrilh duh chuan engmah sawi chhuah ngai lovin I incheina atangin a hriat theih. Mi invawng fel leh mahni inhlut mi I ni tih hriatna tha ber a ni. Uniform hmangin mi hnathawh kan hriat hran theih ang hian I thawmhnaw kha I uniform a ni. Eng ang mi anga hmuh nge nih I duh?

I rilru leh I mizia a pholang. I pawnlam incheinain I chhunglama rilru leh mizia hmuh theih turin a pholang:
Chhung lama mi fel fai chu pawn lamah pawh a hmuh theih thin. Chhung lama mi hnawk chu pawn lamah pawh chuti tho. Inzawmna a awm ngei ngei. Thawmhnaw hak tawk loh, inhmeh loh leh bal pheng phung ha thin chu a mizia tamtak a thawmhnaw inbel atangin a lang.

I incheina a zirin I confi-in I confi lo phah thei:
Chhung lamin pawnlam a khawih danglam angin pawnlamin chhunglam pawh a khawih danglam thin. Ka incheinaah thil diklo a awm anga ka hriat tlat chuan ka ngaimawh a, midangin an rawn hmu ang tih hlauvin ka ngaihtuah buai thin. Ka thiltihah confi takin ka tih ngam loh phah.I incheinaah I hlim tawka nalh I intih tawk viau chuan I confi phah sawt thung. I thiltihah inringtawk takin I ti a, I inrintawk vang chuan a hlawhtling duh zawk bawk. Darthlalangah han inen ila, nalh tha tawk kan intih leh nula hmelthain min hmu ang tih hlaua kan incheina danglamna chu chhunglama mahni inringtawkna leh inrinhlelhna danglamna a ni thei.

Mi zah emaw ngaihnep inkar danglamna a ni:
I duh emaw duh lo emaw miin I incheina atangin an endikin an chhiar reng che. Kan inchei dan atangin miin min biak dan leh kan bula an khawsak dan ni leh thla angin a inthlau thei.
Incheinaa mahni invawng fel mi chu vawikhat kan hmuhna atangin kan zah nghal bik. I tum leh duh vang pawh ni lovin I rilruin a ngaihtuahnaah mi bawrchhar tak ai chuan a thliar hrang thin.

I Nun a thlak danglam ang. Ka nun a thlak danglam:
Ka incheina ka pawisak thin hmain thawmhnaw tam tawk tak ka nei a. Ka inhmeh leh hak tawk tak chu ka nei mang chuang lo. Mahni insiamthat duhna thinlung ka lo neihin ka incheina pawh thlak a hun ta tiin pawisa ka neih loh avangin second-hand dawr atangin ka tan chho a, ka thawmhnaw hak size tak ka hrechhuak a (size tak aia lian zawk ka lo ha thin), hun eng emaw chen chu ka inhmeh tur leh ka lei phak tur thawmhnaw zawngin ka vakvai. Thawmhnaw inhmeh loh leh hak leh tawh loh tur pawh ka lei nual (inzirna a ni). Ka incheina ka thlak danglam takah chuan hun eng emaw chen min hmu tawh lote’n min hai dawn dawna, “I van inchei danglam tawh!” tiin. Miin min zahin min dah pawimawh a, a hma nen han khaikhin ila chhun leh zan dawn dawn a ni. Chu mai a ni lo, hmeichhe lamah pawh ka taksa fitness leh ka incheina ka thlak danglam takah min ena min nuih an rawn awm ta tan a. A hmaa min en ngai mang thin lo hmeichhia kha tunah chuan an mit ka la ve tawh ngei. ka chungah a thlen tak avangin mi thlak danglam tih loh theih rual a ni lo.

KHAIKHAWMNA
Incheina hi pawn lama mi hmuh tur ngawt a ni lo I thinlung chhung a khawih tel a nia.
Chhung lamin pawnlam a hril a, pawn lamin chhunglam a hril. Miin hmu tur chea I duh dan angin inchei rawh. I rilrua I mi nih duh ang tak khan inchei rawh, Thawm-hnaw tam leh to neih lam a ni lo. Thawmhnaw man tlawm tak pawhin nalh takin a inchei theih. A tha thei ang berin inchei la, I ngaihtuahna leh I awmdan pawh a tha thei ang ber a lo ni ang.

Leave a Reply

Your email address will not be published. Required fields are marked *

error: Content is protected !!