National Highway 302, Lunglei leh Tlabung inkar, km 97-a thui kawngpui chu lirthei zawh ngam loh khawpin a chhe tawh a, he kawngpui kaltlanga ni tin ei leh bar mamawh an khuaa chaw lut thin khaw 100 chuang an talbuai tawh hle.
Tlabung atanga The Zozam Times thudawn danin, Lunglei leh Tlabung inkar km 97-a thui kawngpui hi a chhe hle a, hmun hrang hrangah lirthei tana zawh harsa tur khawpa kawng khuar te a awm a, km 97-a thuiah hian km 20 bawr vel chauh kawng pangngai a awm tawh nia thudawn a ni.
Thudawnnain a sawi danin he kawngpui chhawrtu hi sorkarin a pawm khaw 100 bawr vel an ni a, tun dinhmunah chuan he kawngpui kaltlang hian khaw 100 bawr vel huam chhunga chengte chu an zin hlei thei tawh lo a, ei leh bar lak luh kawngah harsatna an tawk nasa hle tawh.
Kawng hi a chhiat tawh em avangin Health department lamin ambulance an kaltir ngam tawh lo a. Tlabung khuaa sorkar damdawi ina doctor-te pawhin natna khirh deuh, khawpui zawk pan ngaite pawh kawng chhiat avang hian an refer ngam tawh lo niin thudawn a ni.
Lunglei leh Tlabung inkar kawng a chhiat avang hian August thla atang khan buhfai phur Lunglei truck-te chu an tlan ngam tawh lo a. Tlabung leh a chhehvel khuain buhfai an tlakchham mai lo nan Disaster Act hmangin Lunglei bawrhsapin sorkar lirtheite pawt chawpin buhfai an phurhtir hial a ni.
Thudawn danin, National Highway 302, Lunglei leh Tlabung inkar km 97-a thui hi Mizoram PWD-in an enkawl lai kum 2018-19 khan siam a ni a, PWD hian kawng siam tur hian company pahnih a ruai a. Kawng siam a nih atanga kum hnih em pawh a ral hmain lirthei tana zawh hleih theih loh khawpin a chhe ta a ni.
Lunglei leh Tlabung inkar kawng chhe zual, khuar thuk lutuk thawm that nan Ministry of Road Transport & Highways chuan Rs nuai 180 chu emergency-a kawng repair nan a sanction a, Shalom Construction ten kumin June thla atang khan kawng siam hna hi an thawk a. Tlabung atanga thudawnna chuan, Rs nuai 180 senga kawng an siam hnu hian kawngpui hi a that belh loh a, a hma aiin a chhe zawk tih a sawi.
Kawng chhiat nasat chungchangah Tlabunga VC leh khawtlang huap pawl dang inzawmkhawmna Tlabung Joint Action Committee-ten thla kalta khan Chief Minister Zoramthanga chu a pisaah hmu in, kawng siam that vat a nih theih nana hma la turin an lo ngen tawh a ni.
Km 97-a thui kawngpui enkawl hna hi Mizoram PWD kut atangin NHIDCL kutah dan a ni tawh a, NHIDCL te hian kum 2020 kum tir lam atang khan an enkawl a ni.