NBA regular season tan ni leh tawhin nimin zinga inkhelah chak zawk tura ngaih team an tlawm hlawm a. Heng zingah champion lai Milwaukee Bucks telin Miami Heat in 137-95 in an sawp.
Heat tan Tyler Herro a langsar a, bench atang point 27 minute 24 a inkhelh chhungin a thawh. Jimmy Butler chuan 21 thawh bawkin season liamta a khelmual pawn lama inthlahdah nia sawi Herro vangin Miami an chak.
“137 score hi a tam a, NBA champion lakah phei chuan tam tak a ni. Tun season-ah hetiang score hi kan neih tam theih kan beisei.” tiin inkhel zawhah Herro chuan a sawi. Heat tan Bam Adebayo a tangkai leh bawk a. Point 20 leh rebound 13 a la.
Bucks tan Giannis Antetokounmpo chu point 15 score in team tana point score hnem berah a tang.
Golden State Warriors in anni ang bawka NBA champion nih chuh thei tur team zinga chhiar tel Los Angeles Clippers chu 113-115 in an hneh a. Clippers hnehna kawngah Stephen Curry chuan point 45 a score.
Los Angeles Lakers an hneh tuma nidang a pha lo nia ngaih a nih hnuah Curry hian 3 points vawi 13 a tum atang vawi 8 a hlawhtling.
Clippers tan star player Kawhi Leonard inhliam karah star dang Paul George chuan point 29 a thawh a. Eric Bledsoe chuan point 22 a score ve bawk.