Ramria nawr karah India sipai hotu lawkte inhmu khawm dawn


India-in a thenawm ramte atanga ramria nekna a dawn mek laiin Indian Army commander lawk rualte chu Army chief Gen Manoj Mukund Naravane-a hovin Thawhtanni atang hian ni li chhung awh turin an thukhawm dawn.
Army hian tun hnaiah ramriah Pakistani leh Chinese sipaite leh hel pawl lakah nawrna na tak an neih mek laiin an hotu rualte hi an inhmu khawm dawn a, hmalak zel dan tur pawh an sawi ang.
Sorkar hotu lian pakhat chuan, “Army hotu lawkte hi Thawhtanni atangin ni li chhung ram himna chungchang leh Pakistan leh China ramria thil thleng mek lo hmachhawn ve dan tur sawiin an thukhawm dawn,” tiin India Today chanchinbu a hrilh.
Pakistani-te hian tun hnaiah India lamah hian mi firfiakte an tir lut nasa hle nia hriat a ni a, LoC dunga inkahhai puan mek pawh an bawhchhe nasa hle bawk.
India leh Pakistan sipaite hian February thla khan inkahhai puanna tura inremna siamin inkahhai an puang a, ramri-ah hmelma ena inen loh an rilruk a; mahse, Pakistan Army hian an bawhchhe zing tawh hle niin India chuan a sawi.
Hetih lai hian Chinese Army chuan Line of Actual Control (LAC) hnaih, Ladakh leh Arunachal Pradesh-ah sipai leh an ralthuam tha tak tak an chhawp reng bawk.
Army chief General Naravane hian tun hnai khan Chinese sipaiten hma lam an pan zel thu leh ramri bul velah an chetla tam zual hle tih an hriat thu a sawi a; mahse, eng pawh thleng se, lo hmachhawna an hmaa ding turin an inpeih reng tih a lo sawi tawh.
Thawhtanni atanga sipai hotu liante inhmukhawm hian tun hnaia Punjab leh a chhehvela Pakistan sipaite leh an hnuchhui pawl, ISI mi che tla tam chungchang pawh an sawi dawn a, mi firfiakten India-a pawi an khawih mai theih ven dan turte pawh an sawi ang.

Leave a Reply

error: Content is protected !!