Pianphunga rualbanlo, Bachelor of Law (LLB) zir chhuak, R Vanrammawii’n hna a thawh zui theih nan GIG Motors atangin tanpuina Rs 50,000 a dawng.
Zirtawpni khan Maruti-Suzuki Arena Showroom, Edenthar, Aizawlah Chief Executive Officer John Lalpeka’n a hlan a, ‘GIG Motors staff-te thawh khawm’ a ni a, ‘tanpuina awmze nei an pe chhuak’ tih a sawi.
Staff-ten thla tin tanpui ngaite tanpui nan Trust Fund-ah pawisa an chhung a, a tul angin management atanga an thawh belh thin thu a sawi.
“Mizoramah zirna chawisan a pawimawh a, thil dang kan tih nasat luatah ngaihsan tur dik kan hlamchhiah em aw a tih theih. Mawimawii hnena tanpuina pek hi thil awmze nei niin ka hria a, Mizo thalaite tan chona nasa tak a pek kan ring a ni,” a ti.
Armed Veng, Aizawla cheng, unau pali zinga upa ber, kum 27 mi, Mawimawii hi 2nd division-ah pass-in pianphunga rualbanlo zinga Mizoram Law College atanga LLB chhuak hmasa bera ngaih a ni.
Ukil hna thawk turin Guwahati High Court hnuaiah amah ngei kala a inziah luh a ngai a, senso turah harsatna tawkin an taxi hralh tuma an awm laiin GIG Motors-in a mamawh an phuhruksak.
Che sawn thei lo, wheelchair-a nawr ngai, Mawimawii chuan, “Lehkha ka zirna kawngah ka tuar nasain ka tan thil a hautak em em a. Tun ka thlen theihna hi Pathian vang a ni. Doctor-ten kum 18 bak dam thleng lo turah min ngai tih ka piin min hrilh a. Pathian hruaina ropui tak dawngin keimahah tum a nei niin ka hria a, Pathian rinchhana thil kan tih chuan thlaphanna tur a awm lo va, harsa thin hle mah se amah nen chuan hlawhtlinna a lo awm zel thin,” a ti.
Progressive Mizo Society brand ambassador ni thin Mawimawii hi Aizawl District Court leh Aizawl District Deputy Commissioner hnuaiah kum khat chhung ve ve hna thawk tawh tawh a. Rualbanlote fuih phurna turin vawi eng emaw thusawia rawih a ni tawh.