Congress party Vice President Lalsawta chuan sorkar rilru tereuhte nei MNF sorkar kan hrawn mek thu a sawi.
“Hawrawp tea ziak niawm taka sorkar rilru tereuhte nei MNF sorkar kan hrawn mek a. Hei hi kum 2023 MLA General Election-ah hawrawp puia ziak, awmze neia kal thin Congress Party hian kan thlak a ngai a ni,” tiin Lalsawta hian Bukpuia mi thar lawm luhna inkhawm neihah a sawi a. “Inkhualtelemna atana kan ram neih chhun, Mizoram hman hi Congress party chuan kan remti lo. Kum 2023 hian sorkar tak tak, naupang chhe sorkar ni lo hi siam kan tum a. Chuvangin, Party hrang hranga awm mekte pawhin kan Party hi min rawn zawm zel turin kan sawm che u a ni,” a ti.
Lalsawta hian, “Ram hruaitute hian dawt kan sawi mai mai tur a ni lo. Mipui hi thudika hruai tur a ni a, mipui tan a kha deuh rih a nih pawhin kan thatna tur a nih chuan ram hruaitu tha chu kan kaltlang ngam tur a ni,” a ti a. Congress Party hi mi tha thlan khawm an nih loh thu leh mi tling lo te te awmkhawm an nih thu sawiin, “Chuvangin, tihsual palh pawh kan ngah ang. Kan lo tihsual tawhte leh mipui mit kan tlun tawk lohnaahte hian mipuite hnenah ngaihdam ka dil nawn leh a ni,” tiin, sorkar tha zawk siam turin nasa takin an inbuatsaih mek thu a sawi.
Congress party in that loh theih lohna bawm an siam tur thu sawiin, “Mipui hruai theih hruaitu ni lo a, mipui hruai thei hruaitu tha kan neih chuan kan ram pawh hi awlsam taka tha mai thei a ni tih kan hria. Chutiang chuan Congress Party-te hi kal kan tum tawh a ni. Chuvangin, Pu Chalrosanga Ralte, Congress Party Official candidate hi khawngaihin lo thlang tling rawh u, in inchhir lo ang,” a ti.
Lalrindika Ralte, MLA pawhin thu sawiin, “Politician-te leh political party-te hian sorkar tha siam hi kan tum tur a ni. Sorkar siam tum luat vanga dawt thu nena politics khelh hi kan bansan a hun tawh a. Politician-ten mipuite hi dawt kan hrilh tur a ni lo,” tia sawiin, Congress party hian ram leh hnam tan ngaihtuahna thar a neih thu leh suangtuahna satliah a ni lo, a takin a chang thei a taka chantir ngei pawh an tum thu a sawi.
Lalduhoma zin loh bill lak chungchang sawiin, “Mite hriat loh leh hmuh miah loh laia kan thil tih duh dan hian kan nihna diktak a tarlang thin. Mipuiah mawi tak angin lang thin mah ila, kan thil tih duh dan hian kan nihna diktak a tarlang thin; chu chu engtikah emaw a lo langchhuak tho tho thin a ni,” Lalrindika Ralte hian a ti bawk.