Tottenham Hotspur in Europa Conference League group stage inkhelah Dutch club Vitesse Arnheim an tlawh a, team nem zawk an tirh chu remchangah la in Vitesse in 1-0 in an hneh.
GelreDome-ah Spurs in Harry Kane leh Son Heung-Min an chawlh hahdam tir a. UEFA hnuaia inelna thar berah Spurs hi a vawikhatna atan an tlawm.
Nuno Espirito Santo-a’n a team thlak kualin Joe Rodon, Dane Scarlett leh Bryan Gil te bul tantu zingah an tel a. Mualneitu lam Dutch team in inkhel an lakah an thunun.
Minute 78-naah chakna goal an khung a. Eliazer Dasa chuan ball tha tak Maximilian Wittek tan a siamsak a, ani in laklawh nei miah lovin goal-ah a khung.
Second half-ah Spurs in winger Bryan Gil hmangin goal ban an tihper a, a bak erawh goal hlauhawm langsar tak an nei lo.
Spurs manager chuan, “Team tha lakah inkhel hautak a ni a, Europa Conference League a team tel te en hian a awlsam thei lo. Kan mualah inkhel pahnih kan la nei a, hei hi kan group chinfel nan a la tawk thei.” tiin hmalam a thlir.
Tottenham manager hlui Jose Mourinho-a’n AS Roma enkawlin season bul tan tha mahse Norwegian champion Bodo/Glimt lakah 6-1 in a tlawm a. Manager a nih hnua a tlawm chian ber tum a hmang.
Erik Botheim leh Ola Solbakken ten goal hnih ve ve an khung bakah Patrick Berg leh Amahl Pellegrino ten goal khat ve ve an khung bawk a. Mourinho hian coach anga match 1008 a hmachhawn tawh zinga a pawlten goal 6 an chhuah hmasak ber a ni bawk.