Congress hi development engkimah an hlawhchham : Dr R Lalthangliana

MNF party adviser Dr R Lalthangliana’n Congress party dinhmun sawiin, “Congress hi central leh India ram state tinin kan hnawl hnu a ni” a ti a. Mizorama sorkarna siam rei tawh ber an ni a, tun dinhmun hi min thlen chu a ni, development engkimah an hlawhchham” a ti.

Serkhana MNYF headquarters huaihawt street campaign-ah he thu hi Inrinni khan a sawi niin MNF party thuchhuahin a tarlang a. “Congress party hotute khan ram veina pakhatmah an nei lo, kawng a chhe em em vek a, an zu zawrh chu kan sorkar tirhah titawpin, sikul kai hunbi pawh kan siamtha nghal a, tun hun reilote chhung hian Congress party hian han that thar thutna chhan tur pakhatmah an nei lo,” a ti.

ZPM party chungchang sawiin, Dr R Lalthangliana chuan “ZPM hi a tirah movement anga kal tumin party ten kan inghahna bulthut ber unit leh block neih tullo titu kha an ni a. tunah unit leh block dinin an hmanhlel hle a, an indin dan pawh hi a tir atangin dawtin mipui min bum a ni” a ti a. ZPM -in kalphung thar an tih chu kalphung thar tak tak awm chuang lo nia sawiin, “Kalphung thar an tih ber nia lang chu ‘Val Upa Council’ leh ‘Zonu’ an ti emaw ni an din vel hi a ni mai” a ti.

Dr R Lalthangliana chuan hripui leng, Vawk hrileng leh ramri buai karah MNF sorkarin kawngchhia tam tak an thuam tha hman nia sawiin, “Ei leh barah harsatna kan tawk lova, Congress sulhnu pawr tam tak kan siamtha tawh” a ti a. “Hripui leng hian ziaawm lam a pan zel ang a, SEDP-ah pawh theihtawpin hma kan la zel dawn a ni,” a ti bawk.

Leave a Reply

Your email address will not be published. Required fields are marked *

error: Content is protected !!