Liverpool in an hmelma Manchester United an timualpho a, United manager sawisel hlawh Ole Gunnar Solskjaer-a hma hun sawi nghing dawt thei tur khawpin Old Trafford-ah result an nei a. 5-0 a chakin an lawm haw.
Kum 10 leh ni khat kalta a mahni muala Manchester City laka 6-1 a an tlawm hnuah Liverpool in an hmelma te nen an inthlauhzia an lantir a. Minute 60 chhungin goal nga an khung a, United in red card an chawi.
Oh Salah
Manchester United chaih phartu chu tudang ni lovin Mohamed Salah a ni a. Liverpool chhuanvawr hi tun dinhmunah khawvelah ani aia player tha an awm lo tia ngaihdan darh mek chu a thawm a ti ring zual. A zawnin match 10 goal a khung tawh a, Red Devils lakah hian hattrick a siam.
United in tihngaihna an hre lova, Solskjaer-a leh a nauten halftime-ah anmahni fans te au elna nasa tak an dawng a. Liverpool in football an khel a, Manchester United in tih ve tur an hre lo a ni ber.
Minute 5-naah Liverpool in an lama goal hlauhawm vawikhat United in an siam zawh veleh an khingpuite tlarhnung an thiat a, Salah-a’n Naby Keita goal khung tur a siamsak.
Minute 8 a liam leh tihin Trent Alexander-Arnold-a ball siamsak chu vengtu nei lova awm Diogo Jota chuan goal-ah a chantir a. Liverpool in ball an chan a United goal an pan apiangin hlauhawmah an chhuah.
Salah-a’n minute 38-naah an goal thumna chiang takin Keita cross atang a khung a, halftime dawnah an goal li na a khung leh hman.
Second half-ah Solskjaer-a’n Paul Pogba dah lutin a team a siksawi a. Awmzia a neih dan erawh a duhawm lo. Jordan Henderson-a ball pass atangin Salah-a’n hattrick a siam zui a, Pogba hian hlauhawm taka Keita a tlawh avangin red card a hmu a, Liverpool midfielder hi zawnchhuah a ngai.
“A thleng leh tawh lovang”
Liverpool coach Jurgen Klopp-a’n an result neih chu beisei phak loh a nih thu a sawi a, “Ni duhawm a ni a, kan club chanchin a bung thar a tling. Mi zawng zawngin he result hi an la sawi reng dawn, a chhan chu a thlen leh mai hi a rinawm tawh lo mai ni lovin a thleng leh tawh kher lovang.” a ti a.
“Ka beisei result a ni miah lo, a mak zawk. Kan khingpuite kan zah vangin lawm chiam pawh kan tum lo. United hi an buai lai ve a ni a, keini lam kha vanneih lai kan nei ve bawk.” tiin a sawi.
Engtinnge Solskjaer-a ni zel dawn?
Manchester United leh Liverpool inkar hi football khawvelah sawifiah ngai a ni lova, fans te tana result na bik, danglam bik a awm thin, chung zingah chuan he result hi a tel.
Liverpool laka tlawm hi Manchester United fans te tan thil na tak a ni a, Pathianni zan ang result phei hi chuan nghawng lian tak nei tura ngaih a ni. Chutihlaiin Norwegian coach hi United hotu lamin an thlawp tlat thin a ni a, mahse tun tumah erawh zawhna in a zui hnem.
Khelmual chhungah Reds lakah United tlarhnung a awm lo ang mai a ni a, muallai leh tlarhma thlengin, team inrem danah khelh tum dan an neih chiang tak sawi thiam tur a awm lo. Player-te an inman lova, eng ang football nge an khelh dawn tih an hre lo. Hei hi Liverpool in remchangah an la a, minute 10 an khelh hnuah inkhelah chak tur a chiang tawh.
Liverpool in an khingpuite that lohna chiang zawkin an tilang a, mahse United buaina hi thil thar a ni lo. Tunhnaiah an player ten anmahni theihna a danglamna an siam leh thin avangin an mualpho tur hliahkhuhin a awm zawk hlauh thin a, Pathianni zanah erawh hliahkhuhtu tur an nei lo.
Solskjaer-a chuan, “Manager ka nih chhunga hun thim ka dai tawha la thim ber a ni. Mimal leh team angin kan tha tawk lo. Kan khelhdan kha ka thlan a ni a, hlawhtling turin ka tih tur kan ti tam tawk lo. Kan thawh leh vat a ngai a, a awlsam dawn lo tih kan hria. Chhuatah kan tlu sawp a, tho leh lo turin kan kal thui tawh lutuk.” tiin a sawi zui.