Tuialhthei man: Sorkarin chhiah lak tihhniam tumna lamah ngaihtuahna a la seng lo


Kumin chhungin India ramah tum eng emaw zat petrol leh diesel man tihsan a ni tawh a, October thla kal mek chhungin tum 15 lai tuialhthei man hi tihsan a ni tawh a; hemi avanga mipuiin harsatna an tawh chhoh mek laiin Mizoram sorkarin tuialhtheia chhiah a lak tihhniam tum emaw, hemi chungchangah emaw ngaihtuahna a la seng lo.
Mizoram sorkarin petrol-ah chhiah 25% a la a, Pathianni khan Aizawlah petrol litre khat Rs 104.62 a ni a, diesel-ah chhiah 14.5 a la bawk a, Pathiannia Aizawla diesel litre khat man chu Rs 95.71 a ni. Mizorama petrol leh diesel man sanna ber chu Siaha district niin, Pathianni khan petrol litre khat 107.59 a ni a, diesel litre khat Rs 98.41 a ni.
Tuialhtheia chhiah lak chungchanga The Zozam Times zawhna chhangin Taxation department hotute chuan, tuna chhiah an lak mek hi June 1, 2020 atanga hman tan a nih thu an sawi a, Value Added Tax (VAT) hi state-in a duha a tihhniam theih a ni tiin, tun dinhmunah VAT an lak mek tih hniam tumna a awm lo tih sawiin, “Hemi chungchang hi tunhnaiah sawihona a awm lo a, sorkar hotu lam pawhin lo ngaihven teh u min ti lo a, department angin ngaihtuahna sen a ni lo,” an ti.
October thla chhunga India rama tuialhthei man ni tin deuh tho tihsan a nih chungchangah hian sorkar laipui hotute demna a nasa hle a, India hmarchhak state thenkhatin tuialhthei man tihsan duh lohnate lantirin nawrh an huaihawt a, Meghalaya-a pawl pakhat chuan sorkar chu VAT a lak tihniam turin a phut a. Hetihlai hian October thla chhungin Mizoramah erawh tuialhthei man tihsan avanga VAT tihhniam tura sorkar nawr emaw hemi chungchanga lungawi lohna lantir a awm lo a; political party leh NGO lamte tuialhthei man chungchangah tawng chhuak an la awm lo.
Mizoramah October 14 khan petrol litre khat Rs 101.93 a nih laiin October 23-ah chuan Rs 103 a ni tawh a, diesel man pawh ni 14-ah Rs 92.96 a nih laiin ni 23-ah chuan Rs 94.98 a ni tawh a. Tuialhthei man ni tin a san zel avang hian Mizorama chhunga lirtheia eizawngte an mangang ta hle.
The Zozam Times-in lirtheia sumdawng pawl hrang hrang hruaitute a biakte chuan tuialhthei man sang zel hi an tuar ta hle tih an sawi hlawm a, a man a san chak laia Mizoram sorkarin lirthei chuan man a bituk zat an hman erawh a bei tham hle tih sawiin, hetiang a nih chuan sorkar pawmpuina kher lo pawhin rate hi an tihsan ngei a la tul dawn nia an ngaih thu an sawi.
Lirtheia sumdawng pawl thenkhat hruaitute chuan, sorkar-in lirthei chuan man a tisang hreh a nih pawhin, VAT a lak hi tihniam se tuialhthei man a hniam phah ang a, chu chuan mipui harsatna tawh mek chu a chhawk thei dawna an ngaih thu an sawi hlawm bawk a, tuialhthei man tihsan hi state sorkar thu ni lo mah se ram chhung mipuite an talbuai miau avangin kawng eng emaw tala hma a lak ngei a ngai tih an sawi hlawm bawk.

Leave a Reply

Your email address will not be published. Required fields are marked *

error: Content is protected !!