Tuirialah party paliten tlin inring vek!


October 30-a Tuirial bial bye-election lo awm turah political party hrang hrangin tlin ngei tumin theihtawp an chhuah mek zel a. Naktip khian campaign theih hun a tawp tawh dawn avangin he inthlanna chuh tur party tinte hian an hun \ha neih hi bawhpelh an tum lo hlawm hle.
Inrinni kalta khan chanchinbumiten bye-election neih tura party pali — rorel lai Mizo National Front (MNF), Indian National Congress (INC), Zoram People’s Movement (ZPM) leh Bharatiya Janata Party (BJP) te inbuatsaih dante thlithlaiin bial chhunga khaw hrang hrang an tlawh.
Khaw hrang hrangah hian party campaign office-te inhnaih tak takah awm hmuh tur a awm thluah a, BJP campaign office tih loh a lun thei hle bawk. Khaw \henkhatah phei chuan campaign office nghak tur hian an inruai \hin nia sawi niin, ‘sitting allowance’ late pawh an awm tih thawm hriat tur a awm nghe nghe!
Political party leh Mizoram People’s Forum (MPF)-te thawhhona thuthlunga party flag tar phal theih chin — village council member panga nei chinin flag 50 tar theih tih erawh chu khaw tam zawkah hian ngaih pawimawh leh zawm a hlawh lem lo niin a lang a. Hmun hrang hranga party campaign office-a flag 50 aia tam tar hmuh tur a awm nual a. ‘Flag war’ a awm tih a chiang hle. A bik takin, Nisapui a\anga Bukpui inkar kawng dungah phei chuan party flag intar hmuh tur a awm thluah a ni.
Khaw pakhata party hruaitu pakhat chuan, an party mi \henkhat chu party dangin in sak \anpuina an tiam avanga insawn dil an awm tih sawiin, “Kan party a\angin party danga insawn tura dilna kan dawn zingah, in sak \anpuina an tiam vang te a ni. Amaherawh chu, he’ng an insawnna tur party te’n thu an tiam anga an awm loh palh hlauh takin tiin invenna’n an intiam lai video-a la \hin turin kan fuih,” tiin The Zozam Times a hrilh.
Tuirial bial a nih hma pawha sum leh therhlo te a leng deuha an hriat avangin MPF pawhin uluk takin, khauh tak leh na takin bye-election neih a nih theihna’n hma an la mek. Hei hian rah duhawm a chhuah niin a lang a, party hrang hrangin boruak muanawm tak karah campaign an nei mek zel a. Hetih lai hian, khaw \henkhatah chuan MLA inthlanpui aiin village council inthlanah hian sum leh therhlo te a leng nasa zawk \hin thu, Lungmuat khaw pa in a sawi thung.
“Tun dinhmunah party hrang hrangte an la inbuan tawk rih viau a. Kar tharah hian eng ang chiah nge danglamna a awm dawn tih erawh sawi theih mai a ni lo va. Campaign theih hun chhung khar a nih dawn hnaih retah hian boruak a inlumlet phut thei ve tho bawk a,” tiin Nisapui khaw-mi pakhat chuan a sawi bawk.
The Zozam Times in khaw hrang hranga mi hrang hrang a kawm kualna a\anga a lan danin, a bik takin khaw te, voter tlemna khuaah te chuan party tinte chu an inbuan tawk hmel rih viau a. Voter tamna he’ng Kawnpui, Thingdawl leh Hortoki boruakah he inthlan hi a innghat nasa dawn tih a chiang hle.
Tuirial constituency huam chhungah hian Kawnpui khuaah voter tam berin, vote awm zat hi 4659 a ni a. Thingdawl-ah vote 2232 awmin, Hortoki ah vote hi 2098 a awm bawk. Serkhan tlangdung he’ng Serkhan (543), Nisapui (633), Lungmuat (487), Hmar Chaltlang (566) leh Bukpui (793)-a vote awm zawng zawng zat belhkhawm 3022 pawhin Kawnpuia vote awm zat hi a phak lo nasa hle a ni.
Tuirial bial bye-election lo awm tura party tinte inbuatsaihna chuan a vawrtawp a thleng hnai tawh hle. October 27 khi campaign theih hun tawp ni a ni. He bye-election-ah hian party pali – MNF, Congress, ZPM leh BJP te’n candidate an nei a ni.

Leave a Reply

Your email address will not be published. Required fields are marked *

error: Content is protected !!