The Kargil Girl

The Kargil Girl

  • Zirsangkima

1999-a Kargil War kha India khua leh tui nihna nei tân chuan theihnghilh theih a ni lo ang.
May 3 a\anga July 26, 1999 chhûnga Kashmir ramrîa India leh Pakistan indonaah khân India lamin nunna 2735 kan chán a, mi 8225-in hliam kan tuar a; zahna chibai kan bûk thar leh e. Pakistan lam chuan mi 5988 an chán thung. Indian tank 80 bomb darh a nih laiin Pakistan lam chuan tank 475 an chán thung. Khatih laia Prime Minister Atal Bihari Vajpayee khân July 14, 1999-ah India-in hnehna a chan thu a puang a; ‘Operation Vijay’ pawh July 26, 1999-ah official-a tih tâwp a ni.
Kha ramri indonaa khan Indian Air Force (IAF) officer, hmeichhe pahnih an tel ve tlat mai a. Tûn hnaiah a pakhat zâwk hming hi a rawn ri ring thar hle. Amah chu helicopter khalhtu (pilot) niin hmun ral\ía sipai hliam tuarte chhan chhuah hna thawka an ei in tûr phurhsak \hintu a ni. A hming chu Gunjan Saxena a ni.

Hmeichhe huaisen
IAF officer, Gunjan Saxena hi kum 1975-ah a piang a, a pa chu Indian Army báng/chàwl tawh, Lt Col Anup Kumar Saxena niin a nu\a neih chhun pawh sipai tho niin Indian Army-ah a awm thung a—Lt. Col. Anshuman a ni.
Saxena hi Hansraj College, University of Delhi a\angin Bachelor of Science (Physics) a zir chhuak a. Sashtra Seema Bal examination-a pass hnuah 1996 khân Saxena hi Indian Air Force (IAF)-a pilot ni thei tura inziak tling thei hmeichhe paruk zínga mi a ni a; anniho kha IAF hnuaia training nei thei batch li-na an ni. Anni zîngah amah leh Flt. Lt. Srividya Rajan te kha râl donaa HAL Cheetah (helicopter) khalh thei tûra thlan chhuah an ni.
Gunjan Saxena hian training a zawh hnuah Jammu and Kashmir, Udhampur-a 132 Forward Area Control (FAC)-ah flight lieutenant nihna chelhin a hna thawhna hmun hmasa ber (first posting) a pan a. Tûn hnua a sawi leh dàn chuan, mipa pilot dangte paw’n hmeichhe awm chhun a nihna chu an pawm thuai thu a sawi.

HAL Cheetah khalhtu Gunjan Saxena
1999-a Kargil indona a chhuah khân Flying Officer Saxena hi kum 24 mi a ni a, Srinagar-a a awm lai a ni. Kargil War-a ‘Operation Vijay’-ah khân sipai hliam tuar, hmun hima thiar chhuah hna te, Dras leh Batalik hmuna awmhmun khuar sipaite mamawh supply hna te a thawk a. Chu bâkah, hna hautak zet mai, hmêlma (Pakistan sipai) te awmna hmun chhui (mapping) a thawk tel bawk. Srinagar-a pilot \ha zual 10 thlan chhuah zîngah pawh tel zêlin hmeichhe awm chhun a ni a. Operation Vijay thlâk a nih chhûng khan Saxena hian sipai ruang leh hliam tuar mi 900 chuang a phur hman. Kum 2004-ah kum riat chhûng HAL Cheetah (indona helicopter) pilot hna a thawhna a\angin a chàwl ve ta a ni.
Kargil War zawh hnu hian Gunjan Saxena te State, Uttar Pradesh-a pâwl pakhat hnên a\angin chawimawina ‘Shaurya Veer’ award a dawng a. Hei hi mi tam tak chuan, India sawrkarin sipai huaisente hnêna a hlan \hin ‘Shaurya Chakra’ award nên an ngaih pawlh avangin ‘Shaurya Chakra’ a nih loh thu Gunjan hian NDTV hnênah a sawi nghe nghe.
2019 khan Rachna Bisht Rawat chuan lehkhabu lãr tak mai, ‘Kargil Untold Stories From The War’ tih a ziak a; bung khat chu Gunjan Saxena chanchin ziahna a ni. Amah Gunjan Saxena hian ama chanchin (autobiography) ‘The Kargil Girl’ a ziah chu Penguin Publishers chuan a ti chhuak a; print leh electronic media lamah fak a hlawh hle.
Saxena hian pasalah Indian Air Force pilot, Wing Commander Gautam Narain a nei a. Ani hi IAF Mi-17 Helicopter pilot a ni. Pilot a nih mai bâkah National Defence Academy-ah instructor a ni bawk a; kum 2004-a piang fanu Pragya an nei.

Inhnialna siamtu–‘Gunjan Saxena : The Kargil Girl’ film
Nikum, 2020 khân Bollywood film, ‘Gunjan Saxena: The Kargil Girl’ chu Netflix-in an ti chhuak a. Saxena lemah hian Janhvi Kapoor a chang a. He biopic hi Karan Johar-a production company Dharma Productions leh Zee Studios te tih chhuah niin Sharan Sharma chuan a vawi khat nân director hna a chelh bawk. He film hi a ‘hit’ hle mai a; hmuhnawm pawh a hmuhnawmin rilru a khawih hle mai. Amah Gunjan Saxena pawh a rawn lãr thar leh ta hluai a. Hetih rual hian he movie hian inhnialna a rawn chaw chhuak ta chiah a ni.
He film-ah hian a nihna piah lama \ha fála a chanchin tàr lanna a awm nual a; tin, Indian Air Force hmai ti bàl thei tûr pawh a kat nuk bawk. Hemi changchâng hi The Hindustan Times hnênah Saxena chuan sawiin, ‘Mi \henkhatin ka nihna dik tak hai luiin thil an ti a ni,’ a ti hial.
Sharan Sharma-a film hian Indian Air Force mit a ti mîm ngang a ni ang, Censor Board hnênah pawh dik lo taka thiltia puh an nih thu lehkha thawnin an tár lang a. IAF officer eng emaw zât bâkah, Gunjan-i coursemate, Flight Lieutenant Sreevidya Rajan (retd) phei chu film siamtute hian a nihna an her sual nasa hle niin an lehkha thawnah chuan an tár lang bawk.
Wing Commander chàwl tawh, Gunjan Sexena nèna thawk dùn \hin Namrita Chandi pawh a lãwm lo khawp mai; film siamtute hnênah hian open letter a thawn hial a. Outlook chanchinbuin a open letter a tih chhuahah chuan, film siamtute chu “Dâwt theh darhtu” tiin a puh hial a, ‘Srividya Rajan hi hmeichhe pilot, Kargil-a thlâwk lût hmasa ber a ni—Gunjan ni loin,’ tih a ziak lang nghe nghe.
Gunjan Saxena pawhin hemi chungchâng a chhànna NDTV hnêna a thawnah chuan, ‘Film siamtute khan ka biopic-ah khan zalènna an neih (cinematic liberties) an hmang nasa lú hret a ni. Tím miah loa ka sawi ngam chu ka nihna dik tak aia chungnung leh chungchuangin movie-ah khan ka lang, tih hi a ni,’ tiin a sawi a, hmeichhe zínga “hmasa ber nihna” an pe hnem lutuk pawh a dik lo tih a pha lêm lo.
Movie lama an tàr lan langsàr tak chu hmeichhia a nih avânga Gunjan Saxena thliar a nihna kha a ni. Gunjan chuan, ‘IAF ka zawm khan organization chhûngah chuan hetiang thil hi eng mah a thleng lo. Mahse, ni e … ka mi mal nunah chuan, eng emaw harsatna te chu a thleng ve bawk mahna le. Mahse, organizational level a ni lo e. “A ni lo fai vek,” ka tih chuan ka sawi dik vek bîk lo ang. Pâwl huap (organizational level)-ah chuan inthliarna chu a awm miah lo,’ tiin a lehkhathawnah hian a ziak a ni.
Hetiang hi a nih teh nuaih rual hian senior journalist pakhat, a hming tàr lan lohin a sawi hi eng emaw chenah a pawmawm viau mai : ‘Film siamtute hian zalèn takin an thiamna (creative license) an hmang thiang a. Kha movie khân a tum ber chu, beiseina nung leh thil thlìr dân dik nei chunga kan suangtuah leh kan beisei ram kan thlìr theih nâna a entute rilru hneh a ni. Keima mi mal nun ngei pawh, he film thawnthu ang chiah hi a ni a. Tin, he film hi Kargil war documentary film a ni ber lo tih hriat a \ha,’ a tih hi, he movie en tawh leh en tum te paw’n rilruah nei ila a \ha mai àwm e.

References:

  1. https://www.hindustantimes.com/bollywood/gunjan-saxena-responds-to-claims-her-biopic-is-peddling-lies-trying-to-dent-hard-earned-reputation-with-nonsensical-rants/story-hj7xJKovXZwSSQpGi9HIBJ.html
  2. https://en.wikipedia.org/wiki/Gunjan_Saxena
  3. https://www.dnaindia.com/bollywood/report-shaurya-stories-all-about-india-s-first-woman-iaf-combat-pilot-gunjan-saxena-the-kargil-girl-2868419
  4. https://www.indiatoday.in/india-today-insight/story/how-gunjan-saxena-the-kargil-girl-flew-into-controversy-1712327-2020-08-18

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427