Tuirial bial bye-election lo awm tura campaign mek, ZPM party leader Lalduhoma’n nimin khan Lungdaia ZPM party campaign office-ah hun hmangin, Congress party an tlahniam nasa hle niin a sawi a. MNF party pawh party nghet tak ni mah se, an kaihhruai dan a lungawithlak loh thu a sawi.
Lalduhoma chuan MNF party chu an dinchhante ngaihtuah chuan ram leh hnam hmangaih ber awm an nih laiin, ram an kaihhruai dan enin a lungawithlak loh niin a sawi a. “Kum 35 chhung party pahnihten kan ram an inhruai chhâwk a, retheite kan rethei reng a, hausate an hausa zêl a, mipui nawlpui thleng phak hmasâwnna hnathawh sawi tûr pakhatmah an nei lo,” a ti.
MNF leh Congress party-in ram an hmangaih tak tak lo a ni tih chu ramri buai chungchangah leh hripui an do danah a chieng niin Lalduhoma chuan a sawi a. “Ramri buai chinfel dan thuruk chu tûn thlengin thuruk a la ni a, khawvela lockdown rei ber record kan siam chung pawhin hri vei tam berna pâwl kan la ni reng a nih hi,” a ti.
Lalduhoma chuan “Kum 35 chhung party pahnihten kan retheihna hmanruaah hmangin inthlana chak nân an hmang a, mipuite hi min inlilamsiak a, a chhang huai apiangin min lei a, tun thleng hian mipui lei tûr zawngin an la buai,” a ti a. Mipuiten MNF ni lo, Congress ni lo party an duh tawh niin a sawi.
ZPM party-ah mipui beisei a sang hle nia sawiin Lalduhoma chuan, “An thikthu pawh a chhe bawk,” a ti a. “Keini chuan mipuite kan tibeidawng ve thiang lo va, kan sorkar tuk a\angin kan mi thiam rualten research based-a ruahmanna an lo siam tawh hmangin ram kan hruai dawn a ni,” a ti bawk.