Formula 1 : Hamilton-a’n Verstappen a umpha ngang lo

Kumin a Formula 1 world champion nih tum Max Verstappen leh Lewis Hamilton te Pathianni zanah an inum a, season tluan a Red Bull leh Mercedes car khalhtu inel pahnih inumah hian Verstappen zawk a chak a. Intlansiak tawp dawn lamah Hamilton-a’n um viau mahse a dinhmun tha himin United States Grand Prix-ah hnehna a chang.

Austin, Texas a tlankawng Circuit of the Americas-ah a hmasa ber atanga bul tan Dutch driver aiin pahnihna atanga tan Hamilton-a’n bul a tan tha zawk a. Mercedes driver hian hmahruaitu ni hmasa zawk mahse kum 24 mi hian ‘race strategy’ huaisen an neih a ngai tih a hria a. Car ke thlak hma-sa zawkah tangin Hamilton ‘undercut’ a tum a. Mercedes driver in a car ke a thlak ve in Verstappen hian car ke thar hmanga chak zawka a tlan theih avangin a lehpel hman a, hma a hruai.

Hamilton-a’n a tyre chu rei zawk rin a, intlansiak tawp dawna tyre la nei tha zawk ni chunga Verstappen um a tum a. A tawp lap hnih a la awmin a elpui nen an inkarah second khat awm tling lo mahse Red Bull car khalhtu hian a hmahruaina a humhim tluan hram.

Verstappen chuan, “Bul kan tan chhe zawka, kha vang khan kan tactic kan thlak a ngai. COTA-ah tyre a ral chak riau avangin risk kan lak a ngai a, kan ti fuh ang em tih sawilawk theih miah loh karah a tawp kan thleng kha thil lawmawm tak a ni.” a ti.

Hamilton-a’n, “Max a tlan tha em a, bul tan tha mah ila a tawpah chuan tun kartawpah anni an tlan tha em em a, a bak tih theih kan nei tam lo a ni.” a ti ve thung.

Leave a Reply

Your email address will not be published. Required fields are marked *

error: Content is protected !!