Union Home Minister Amit Shah chuan Thawh\anni khan a thu sawina tur hmaa silai kah thlang theih loh darthlalang (bulletproof glass) an dah chu la thlain mipui hnena tlang taka thu sawi a duh zawk tih a sawi.
Srinagar-a vantlang inkhawma a tel hmain lak thlaktirin a hnua thu a sawinaah, “Mipuite hnenah direct-a thil sawi ka duh zawk a ni,” a ti.
Shah hi Sher-e-Kashmir Convention Centre-ah hian Jammu & Kashmir Lieutenant Governor Manoj Sinha nen dawhsanah chhuak dunin a bulletproof shield chu la thla turin a ti a. Vengtuten an la thla zui bawk.
Hemi hnuah hian thu a sawi zui ta a ni.
“Vawiin hian mipui hnenah tlang taka thil sawi ka duh a, chu chu bullet proof shield leh venhimna dang ka dah chhan a ni a, hetah hian nangmahni ang bawkin ka lo ding a ni,” tiin Kashmiri-te inchei dan, pheran nena inthuamin thu a sawi.
“Farooq (Abdullah) Sahab hian Pakistan be ngei turin min duh a; mahse, Pu Farooq, vawiin hian \halaite leh Kashmir Valley-a mite hi ka be zawk dawn a ni,” a ti.
Shah hian ni thum chhung Jammu & Kashmir hi tlawh mekin hei hi August, 2019-a parliament-in Jammu & Kashmir a hungna dan, Article 370 hlipa state ni \hin union territory pahniha a \hen hnua a tlawh hmasak ber a ni.
Home minister ni chung erawh chuan kum 2019 inthlana BJP an chak hnu lawkah a tlawh tawh thung.
“Article 370 hlih takin a tum chu pakhat chauh a ni – Kashmir, Jammu leh Ladakh te hmasawnna kawng zawhpui a ni. Kan thiltih rah hi kum 2024-ah chuan inhmu dawn,” a ti.
Thu a sawi zawhah hian Shah chuan mipuite chu hnai takah chibai a buk kual hlawm.
Home minister-in Kashmir a tlawh hi tun hnaia civil mi leh venhim hna thawktuten beih an tawh tam lai tak a ni a. Sorkar hotute chuan a tlawh hi mipuiten sorkar an rin theih nan leh Jammu & Kashmir-a mi tin an himzia pho lanna tura hmalakna a nih thu an sawi.
&&&&&