auto corner
by Ruata
Mahindra hmathlir – SUV mawi tak tak chhuak chho zel dawn
Mahindra XUV900 tih hming pu tura beisei SUV Coupe huanga mi tur, a codename-a W620 an hman pawh kum 2023 chho vel thoah hian a chhuah hmel bawk a, a changkang dawn viau bawk
India ram lirthei company lar leh rintlak tak mai Mahindra chuan an SUV line up-ah lirthei thar an rawn belh chho zel dawn a, heng lirthei te hi muangchangin an tichhuak zel dawn a. Kum 2026-ah chuan Untility Vehicle 9 tihchhuah hman an tum a ni.
Tunhnaiah Mahindra chuan XUV700 an tichhuak a. He SUV hi a mawiin a tha khawp mai a, a elpuite zingah pawh a chak ber pawl a ni bawk. Tunah hian market lamah kan hmu chho dawn a, eng nge a an dawn tih chu la nghah rih phawt a ngai dawn a. Hetihrual hian a lirthei that zawng leh kentel ngaihtuah chuan, elpuite zinga lei hlawh ber tur pawl a nih pawh a rinawm a. Tunah pawh lei duhte tana an nghah chhung tur ‘waiting period’ chu kum 1 dawn a ni tawh a ni.
Scorpio thar
Mahindra hian kum 2022 kumtir lamah Scorpio thar tur hi an tihchhuah hman beisei a ni a. Hei erawh puanchian a la awm lo thung a ni. Hetihrual hian Scorpio thar tur hi India ram kawngpuiah an test lai hmuh tur a awm nual tawh thung a. Eng nge danglam dawn tih vel pawh heng lirthei hmuh tur awm ho atang hian a hriat theih nual a ni.
Scorpio thar tur (new generation model) hi a hma aiin a len hret hmel a. Mahindra Thar chhuak tharin a hman ladder frame chassis ang tho nghahchhana duan tur a nih hmel bawk. Scorpio tharah hian thutna tlar thum a awm theih hmel a, a hnung ber hi a hmaa inhawitawna thut theih ang kha ni tawh loin a hmalam a hawi tawh dawn a, 7 seater bakah 5 seater duhthlan tur a awm beisei a ni bawk.
A khawlah chuan chi hnih – 2.2-litre 4-cylinder mHawk turbo diesel engine, 155bhp power leh 360Nm torque pechhuak thei leh 2.0-litre 4-cylinder turbocharged petrol engine, 150bhp power leh 300Nm torque bawr vel pechhuak thei a rawn hman beisei a ni a. Transmission-ah chuan 6-speed manual leh 6-speed torque converter automatic te duhthlan tur a awm ang a. Rear-wheel-drive layout chu standard-in a rawn kal ang a, a man to hoah All Wheel Drive system a neih hmel bawk a ni.
Bolero thar
Hmanni lawk khan Bolero Neo chu TUV300 nghahchhanin tihchhuah a ni a. Hemi ni lo new generation Bolero chu kum 2023 leh kum 2026 inkarah tihchhuah hman theih beisei a ni. Report thenkhat chuan kum 2023-24 bawrah an beisei bawk a ni. Tuna model hi rawn tuaithar ve zeuh zeuh thin mahse kum 10 chuanga upa a ni tawh a, Thar leh Scorpio thar tur ang bawkin ladder frame chassis thar nghahchhana duan a ni dawn bawk a ni.
Bolero hi Mizoramah pawh lirthei lei hlawh em em mai, nalh reng mai, lirthei thing thei lo pawl tak a ni a. A chhuak thar, generation thar hlak a lo chhuak tur hi a nghahhlelhawm em em a ni.
A khawl lamah hian Mahindra Thar in a hman mek ang, 2.2-litre turbocharged diesel engine, 132bhp power leh 320Nm torque pechhuak thei a hman hmel a. Marazzo leh XUV300 in an hman, 1.5-litre turbocharged diesel engine, 121bhp power leh 300Nm torque pechhuak thei a hmang maithei bawk. Next-gen Mahindra Bolero hian 2.0-litre emaw 1.5-litre zawk emaw turbocharged petrol khawl a neih tel hmel bawk a ni.
XUV500 thar
XUV700 thar chhuah ruala tawp zui XUV500 chu Mahindra chuan a hmaa an puan tawh angin an rawn tuai thar leh ang a, Next-gen XUV500 mawi tak rawn tihchhuah leh an tum a. Hei hi mid-sized SUV huangah a awm ang a, Hyundai Creta, Kia Seltos leh adangte a rawn el dawn a ni. A hmaa chhuak ai khan a tet hret hmel a, XUV300 leh XUV700 inkar awl a rawn luahkhat dawn a ni.
Mahindra XUV500, a codename atana S301 an hman hian a khawl lamah chuan XUV300 in a hman mek ang 1.5-litre diesel engine tuaithar a hman beisei a ni a. Kum 2023-a pollution lam inkhuahkhirhna khauh zawk chhuak tur BS6 Phase II mil a rawn nih beisei a ni bawk. He SUV hian 1.5-litre mStallion turbocharged petrol engine 163bhp
power pechhuak thei a neih tel beisei a ni bawk.
Lirthei dang
Heng tarlan ho bakah hian Mahindra hian Thar 5-door version an duang mek tih an puang tawh a, hei hi kum 2023 chhoah tihchhuah hman beisei a ni bawk. Mahindra XUV900 tih hming pu tura beisei SUV Coupe huanga mi tur, a codename-a W620 an hman pawh kum 2023 chho vel thoah hian a chhuah hmel bawk a, a changkang dawn viau bawk a ni.