Colombia chuan United States-in khawvela ruihhlo tawlhtu (drug trafficker) hlauhawm ber tia an sawi chu a chungthu ngaihtuah turin an thawn thuai dawn tih a sawi.
Otoniel-a tia hriat, Dairo Antonio Usuga hi Colombia sipai leh police rualin Colombia-a Uraba province-a thingtlang kilkhawr takah Inrinni khan an man a. Man tura an thawh chhuahnaah hian Colombian special force mi 500 vel leh helicopter 22 an thawk chhuak.
Justice Minister Wilson Ruiz chuan an sorkar chuan an ram Supreme Court hnenah Otoniel-a hi US-a thawn luh phalna an dil mek tih Pathianni khan Reuters news agency a hrilh a, tifel tur chuan chawlhkar li vel a ngai dawn niin a sawi.
“Khawvel huap pawikhawihtu thawn chhuah hun hi nghah a ngai a ni,” tiin Defence Minister Diego Molano chuan an manna, Necocli-a thuthar lakhawmtute a kawmnaah a sawi.
Otoniel-a hi kum tin cocaine tonne sang tel ram pawnah a thawn chhuak thin a, US Drug Enforcement Agency chuan kum tam tak an lo zawn tawh niin a lumanah pawh $ maktaduai nga an chhiar.
US hian Otoniel-a hi kum 2009 khan thubuai siamsak hmasa berin kum 2015 khan New York leh Miami-ah an siam belh zui bawk.
Colombia sorkar hian a lumanah peso maktaduai thum ($ 8,00,000 chuang) an chhiar ve bawk.
Molano-a chuan luman an chhiar hi an pe ngei dawn niin a sawi.
Otoniel-a hi drug-trafficking group Clan del Golfo, Gulf Clan an tih bawk hotupa niin Colombia-a province 32-a 12-ah an inzar pharh a, Colombian police-te chuan member 3,800 chuang an nei niin an sawi.
Clan del Golfo hi dan lova thil laih chhuahna hmun siam leh sorkar leh khawtlang hruaitu thahte an ching bawk.
Police chief, General Jorge Vargas chuan an man theih chhan hi Clan del Golfo member hnen atanga an hriat ruk niin a sawi.
“Clan del Golfo-a miten an phatsan a ni,” tiin Vargas chuan a sawi.
Otoniel-a hian Clan del Golfo hmang hian kum tin cocaine tonne 200 vel thawn darh thin anga chhut a ni a, Colombian sipai leh police 200 chuang thihnaah inhnamhnawih ngei niin defence ministry chuan a sawi.
Colombian thuneitute chuan kum 2016 khan Operation Agamemnon thlakin Otoniel-a lamtang tam tak an man a, an that bawk a, a sumdawnna pawh hniam ve deuhvin amah pawh a biruk kual nasat phah niin police chuan an sawi.