Tuikukte vote thlakna kal man tumsak lo turin party-te hriattir


Chief Electoral Officer (CEO) P Jawahar chuan Tripura awm, Tuirial bial chhunga vote nei Tuikukte vote an thlakna tura an kalna senso ngaihtuahsak lo turin political party-te hriattir an nih tur thu a sawi.
Nimim khan Jawahar chuan Tripura Transit Camp-a awm mek Tuikuk voter 663-te vote thlakna tur, Hortoki Booth II leh Zodin Polling Station a tlawh a, hemi hnua Awithangpa Group YMA leh Hortoki Joint YMA hruaitute nen an inkawmnaah Tuikuk vote neite kalna senso political party emaw, candidate-ten emaw an ngaihtuahsak chu Model Code of Conduct bawhchhiatna a nih thu a sawi a, “Hetiang zawnga hma la lo tur hian political party-te hriattir an nih dawn,” a ti.
CEO chuan Election Commission of India (ECI) duh dan ang thlapin engkim kalpui a ni dawn tih a sawi a. YMA hruaitute zawhna chhangin CEO chuan transit camp-a awm mek Tuikukte tan special polling station siam tura tihna a la awm rih lo tiin, “Mizoram Electoral Roll-a vote nei an nih avangin MLA thlang turin an lo kal ang,” a ti.
YMA hruaitute chuan electoral roll-a hming chuang dik tak Bru-te hian anmahni sensoa vote an rawn thlak a nih chuan hnialna an nei dawn lo tih CEO hnenah hian lo tih a sawi a, hetihlai hian an kalna senso emaw, pawisa dang seng emaw an awm chuan vote thlak an remti dawn lo tih a sawi.
CEO Jawahar chuan inthlan niah election official-te tanpui tura NGO te an awm theih a beisei a, thil fel lo an hriat apiangte chu anmahni tawka chinfel tum mai lovin official-te hriattir zel turin a ngen a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427