TUIRIAL BIAL INTHLAN BORUAK A CHIRI by Hmingsanga Pa

TUIRIAL BIAL INTHLAN BORUAK A CHIRI

  • Hmingsanga Pa

Tuirial bial inthlan chu a tir aṭang khan uluk takin ka lo zirin nitin boruak inlumlet kha ka lo thlir reng a. A ngaihnawmin Mizoram inthlanah chuan thawm a la ring ber hial awm e. Vote lei te hi inthlan bawr lai tak vela ri ṭhin kha inthlan hma fe in a ri ring ta hle mai a. Thu tiam leh beihletna pawh a na pap pap hle.
Ka hmuh dan chuan inthlan puan anih rual khan ZPM kha an lian lawr sa a. Tling mai tur anga an ngaih an nia. An bialtu MLA sunna atan ringawt pawhin a tlin mai kha a rinawm bawk. Ruling party mnf kha chhiat hmel viauin lang mahse pahnihna kha chu nisa mai tur niin an lang bawk. Congress lam chu boruakin a zir rih lo bawk a, pathumna kha an pe deuh vek a. An tan kawngko a sang hle.
Inthlan campaign karhnihnaah boruak a danglam a. Rin loh deuh maiin Congress party lam kha an rawn kang chho a. An candidate in a zirin a zei deuh ani ang, report apiangah hma an sawn thu a lo lang ta daih a. Ruhrel lian na na na chu an ṭang thei phian a lo ni. Tlinna chance an nei ve ta tlat mai.
Karthumna ṭantirah ZPM an talbuai a. Kil tinah mi leh sa an chan thu a lo thang ta chum chum a. An mite an zam a, an party chhunga lungrual loh rukna thawm a awm ṭan a. Hei hi thil dang vang nilovin kalphung thar thlen tir tum danah lung a rual lo niin a lang. Dik taka campaign a, tlin loh pawh pawi lo ti pawl leh tlin theih dan zawn phawt mai a, midang tihdan a tih ve mai duh pawl an inṭhen deuh ni berin a lang.
Congress in hma an sawn khan ruling party hi pathumnaah an tla thla dawrh niin a lang a. MNF campaigner tam tak pawh rilru beidawng an ang ṭan a. Ruling in pathumna an hauh tih thawm pawh a awm hman nual mai. Mahse, ruling party na na na chu an lo ṭang thei hle. Minister te an che chhuak a. Party hqrs in campaign programme an han duang a. Minister leh MLA te ṭhutchilh bial tur an han insem fel a. Covid boruaka hmingchhiatna pawh hri kai thar an lo tlem ta bawk nen, ruling tan hawichhuahna chance a lo awm a. Ram rethei na na naah chuan mipui chu sawrkarin an khuaa an hmalakna tur an han puang chur chur a. An boruak a kang chho ṭan leh ta.
MNF boruak a kan chiah hian Congress chu thui tak an lo in vuan nghet hman a. ZPM lam erawhin an tuar ta ber niin a lang. Congress aiin mihring an chan tam a. Hei hi an party structure la ngheh tawk loh lanna a ni. A tira Congress pathumna chuan pahnihna nghet deuhin an chelh a. Engnge an an dawn a la hriat chiah loh.
Inthlan kar a lo ni chho a. Congress chu hma zawngin an la kal bek bek naa ruling hi an tling ngei hmel ta deuh a. MNF chuan chakna an hmuh hmel rih. ZPM hian tunah tak chuan chance an nei tawh lova. ZPM hian mnf chakna hi an letthla zo tawh lova. Mahse, ZPM hian MNF hi tling lo tura an duh hrim hrim chuan Congress candidate hi vote pui vakin mnf an la paih thei a. Inthlan lehah chance an la insiam thei tho bawk. Congress lamin ZPM an sawm thiam leh thiam lohah a innghat ta a. Serchhip bial bye election a ZPM a sang vak ang tho khan Congress hi ruling duh tawh lohna zarah an kang duai thei tho.
Eng tak thleng ang maw. Inthlan hi chu zanhnih khata danglam duai duai thei a ni tlat mai a. Ka rin leh ka rin tih ang vel kha a la ni tho mai.

Leave a Reply

Your email address will not be published. Required fields are marked *

error: Content is protected !!