2019, April – October 2021 ah Lawngtlai district-ah POCSO case 30 awm

Kum 2019, April atanga October 2021 thlengin Lawngtlai district-ah kumtlinglo laka mipat hmeichhiatna lam hawia dan bawhchhiatna (POCSO case) 30 a awm.

Lawngtlai district level child protection committee-in tun hma aiin Lawngtlai dist-ah kumtlinglo laka mipat hmeichhiatna lam hawia dan bawhchhiatna a thleng tam nia sawiin, tanlak lehzual a tul tih an sawi a. Zau zawk leh mipui huam kim zawka inzirtirna kalpui chhunzawm zel tul an tih thu an sawi.

District level child protection committee chuan Lawngtlai district-a zirna in tinah a bika naupangte himna kawng ngaihtuahtu nodal officer ruat vek tawh an nih thu an sawi bawk.

District child protection unit (DCPU) enkawlna hnuaiah naupang enkawl leh venhim ngaite enkawlna (children home) 1 – Lairam Motherless Home (LMH), naupang dan kalha che te enkawlna (observation home) 1 – Lawngtlai Observation Home (LOH) leh dan anga fa lak lam buaipuitu (adoption centre) 1 – Lairam Child Adoption Centre (LCAC) a awm a. LMH-ah naupang 21, LOH-ah naupang 2 leh LCAC-ah naupang 1 awm mekin nimin thleng khan dan anga naupang fa atana lak (relative adoption) 5 tihfel tawh a ni.

Lawngtlai DCPU hnuaia committee hrang hrang zingah naupang enkawlna leh himna lam ngaihtuahtu – Child welfare committee (CWC)-in kum 2012 atanga tun thla thlengin case 460 nei tawhin, case 450 chin fel tawh a ni a; naupang dan kalha che te chung thu ngaihtuahtu – Juvenile justice board (JJB)-in kum 2012 atanga tun thla thlengin case 135 nei tawhin, case 132 an ching fel tawh. Lawngtlai district-a police station 5 leh police outpost 2-ah te child friendly corner din vek tawh a ni bawk.

Leave a Reply

Your email address will not be published. Required fields are marked *

error: Content is protected !!