NT Lalbiakkima’n a vawi khat nan Mizo leilungah professional boxing a khel dawn a, LPS Fight Night 2-ah International Boxing Association (IBA) inter-continental title humhim tumin Gerttipong Kumsahwat nen an inhnek ang.
November 27 zanah Dawrpui Multipurpose Hall, Aizawlah LPS Fight Night 2 buatsaih a ni dawn a, November 3-ah khuhhawnna neih tumin ruahmanna an siam.
Vawi nga LPS Pro Fight lightflyweight champion Biakkima’n professional a luhchilh atanga tum hnih a inlannaah IBA inter-continental kawnghren hnek chhuakin, Mumbai-a tum hnih a inhnek tawhah a bitumte a knockout ve ve.
Siaha fighter hian a tum khat nan Mizo leilungah professional a khelh dawn bakah Indian ni lo ram dang mi nena an inhnek hmasak ber tur a ni a, weight zang berah amah aia tawn hriat ngah kum 23 mi Kumsahwat nen an intawng dawn.
IBA-in Mizorama title fight buatsaih turin LPS Boxing Promotion hnenah phalna a pe fel tawh a, round 10 awh tur a ni.
LPS Fight Night 2-ah hian inhnek vawi sarih awm tura tih niin Mizo boxer dang paruk an inlan dawn bawk a, Indian boxer vek an hmachhawn ang.
Vanlalawmpuia (Khuangthing), Laldingliana (Tuipui), F Zoramchhana (Cherhlun), C Lalhruaitluanga (Mualpui) leh HC Lalramfela (Chawngtlai) bakah, Hnahthial boxer H Lalrinhlua’n a vawi khat nan professional boxing a khel dawn a ni.
August 6 khan Biakkima’n technical knockout hmangin Sandeep Singh a hneh a, IBA inter-continental title lain hemi hnu hian chhungkua leh mi mal thilah harsatna a tawk.
September 12 khan social media-ah boxing a chawlhsan tih puangin Mizo mipui a barakhaih viau a, amah thlawptuten chawl lo tura an ngenna a pawm a, ni 12 hnuah kir leh turin thutlukna a siam.
Chona thar a hmachhawn dawn a, a beih leh tur Kumsahwat hian professional huangah hnuhma nei tha tawk lo mah se tunhnaiah insiam thain, vawi ruk chak tawhin mi panga a knockout a, tum kua a tlawm tawh.
Thai fighter hian a inhnek hnuhnun ber September 26 khan technical knockout-in Benjaphon Phokam a hneh a; February 29, 2020 khan WBO Asia-Pacific title chuh tawhin Vietnamese boxer Sam Minh Phat lakah a tlawm ve thung a ni.