Iraqi venhim hna thawktute chuan an ram chhung khawchhak lam, Diyala province-ah ISIL (ISIS) firfiakten khaw pakhat an beihnaah mi 11 vel an that a, eng emaw zatin hliam an tuar bawk tih an sawi.
Thawhlehnia thil thleng hi ‘mahnia invenna nei lote beihna’ tiin an sawi a. Muqdadiya khaw bul lawka al-Hawasha khaw mite an bei niin Joint Operations Command chuan an thuchhuahah an tar lang.
Police chuan a beitute hian lirthei eng emaw zat thawh chhuahpuiin semi-automatic silai an hmang niin an sawi.
Associated Press news agency chuan thuneitu pahnihte hnen a\anga a thu dawn tar langin ISIL fighter-te hian thingtlang khaw mi pahnih an ru bo phawt a, a hnuah an khua hi tlanna sum an phut ang an pek theih loh avangin an rûn leh ta a. “Thi leh hliamte hi civil mite vek an ni,” an ti.
Iraqi President Barham Salih chuan Twitter-ah beihna hi Iraq ram tihderthawn tuma beihna tenawm tak a nih thu a tar lang a. An ram chuan venhimna lam tihchak an mamawh thu leh hmun hrang hranga venhimna inthlau lutuk tihzim a \ul thu a sawi a. ISIL-te chu ngaihthah mai mai chi an nih loh thu a tar lang bawk.
ISIL hian an vanglai chuan Iraq ram pum deuhthaw bakah an \henawm, Syria ram \henkhat pawh an thunun a, an ‘lalram’ angin an chhal.
Kum 2017-a ISIL hneh deuh vek an nih hnuah khan Iraq-ah hian tun \uma mi anga civil mite beih hi a tam tawh lo hle a. ISIL hi hmun hrang hrangah chuan an la awm reng.
United Nations-in kumin kumtir lama report a tihchhuahah chuan Iraq leh Syria-ah hian ISIL fighter 10,000 chuang an la awm niin an sawi a. Beihpui an la thlak reng a, a bikin venhim hna thawktu, power station leh hmun pawimawh lian deuh an tum niin an sawi.
July thla khan Baghdad-ah bomb tipuakin mi 30 an thi a, mi tam takin hliam an tuar bawk.