Tuirial bial bye-election neihna tura polling station-a venhimna leh medical lam thawka duty tur tana ballot paper hmanga vote thlakte chu Dr H Lalthlangliana, District Election Officer, Kolasib district chuan an dawn kim tawh thu a sawi.
Tuirial bial bye-election-a duty tura ruat te hi mipa 23 leh hmeichhia pakua niin, an vaiin mi 32 an ni. October 26 khan Kolasib DC Conference-a he inthlana duty turte tan vote thlak hun hawnah mi 29-in vote an thlak hnuah, mi dang pathumte postal ballot tur chu Kawnpui Police station-ah thawn a nih hnuah, nimin khan Dr H Lalthlangliana hian postal ballot 32 an dawn kim tawh thu thu thar thehdarhtute a hrilh.
Hetihlai hian, Tuirial Assembly bial chhungah hian India sipai (Army) hrang hranga tang (service) lai mi 134 awmin, heng mite pawh hian vote an thlak theih nan postal ballot thawn vek ni tawh mah se, nimin tlai thleng khan service vote erawh pakhatmah an la dawn loh thu a sawi thung.
Tun \um Tuirial bial bye-election neih turah hian vote nei mi 17911 awmin, mipa 8819 leh hmeichhia 9092 an ni a. Polling station hi 27 awm tura ruahman a ni a. October 27, tlai dar 6 a\angin October 30, tlai dar 6 thleng ‘silent period’ puan a ni a. Inthlan hi zing dar 7 a\anga \anin tlai dar 6 thleng vote thlak theih hun hawn a ni dawn a. He inthlana vote tla te hi Govt. Kolasib College-ah November 2, 2021 khian zing dar 8 a\anga chhiar \an tur a nih thu DEO, Kolasib district hian a sawi.