Inthlan atan ngawrh lehzuala inbuatsaih sauh a hun
Tuirial bial bye-election neih hun a hnai zel a, nimin kha campaign theih hun tawp niin, ECI chuan helai biala vote nei lo campaigner te chu anmahni hmun lama haw turin a hriattir a, chumi awih chuan mi tam tak an kir leh tawh bawk.
Kan hriat tlan theuh angin Tuirial bial inthlan thatna awm turah hian party hrang hrangin thawm an nei lian hlawm hle a, inbeihna pawh a na in, MPF lam khap ngai an tam hle. Ral atanga thlir mai pawhin mita hmutute sawi leh hriat dan hi a dikna chen a lo awm zel bawk nen, boruak tang ru tak chu a awm tih a chiang reng mai.
Tunah campaign hun a tawp chho a, bial pawn lam mi an haw chho ta bawk a, bial chhung mi, party worker ten hun tawp am takin hman an tum ngei dawn tih a chiang reng. Thawm riva lo awm tawh dan enin therhlo-ilo a leng vak lovang tih pawh a sawi theih loh. ECI leh MPF lam pawhin uluk leh khauh zawka khawtin an vil uluk a ngai khawp ang.
Inthlan dawn ni hnaihah ngat phei chuan mawi leh mawi lo pawh thlu lova che duh mai an awm lovang tih a sawi theih hek loh! Chuvang chuan tun atanga hmalatute an inbuatsaih nghal char char a tul khawp mai. Chutiang tur chuan hmalatu hrang hrangte pawh inbuatsaih nghal mawlh teh se.
Political party hrang hrangte chuan an tlin ngei theih nan theihtawp an chhuah dawn tih a hriatsa vek a, engti pawhin lo khawsa se, chumi veng tura dinte chuan a tak takin, ni hnih khat chhung na na na chu hma la ngam ngei bawk rawh se.