Brazilian senator (an ram rorelna ina member)-te chuan President Jair Bolsonaro-an Covid-19 hripui a hmachhawnpui danah fel tawk lo leh mi tam tak thih phahna a thlen tia puhna awm chu an thlawp.
Bolsonaro-a hi Senate hnuaia committee (panel) chuan a hma lak dan chhui chiangin mi 6,00,000 chuang an thih phahnaah hian hma a lak dan a fuh loh avang leh a ngaihthah avangin mawhphur tiin an puh.
An chhuinaa an thil hmuhte hi Bolsonaro-an chief prosecutor atana a ruatin ngaihtuahin hrem tur leh tur lovah thutlukna a siam ang.
President hian engmah tih dik loh a nei lo tih a la sawi reng a; mahse, mipuiah a tla na lo sawt tawh hle.
Brazil-a Covid-19 thihpui hi United States dawtah an tam ber a ni.
Senator-ten president puhna an thlawp hi thiam loh chantirna atan chuan kawngro a su tehchiam chuang lo va, Prosecutor-General Augusto Aras chu thutlukna siamtu ber tur niin ani hi president lam\ang a nih avangin a chhan ngei rin a ni sa.
Report-ah hian president chu ‘sorkar laipuiin hripui a hmachhawn dana tih sual tam tak awmah a mawhphurtu ber’ tia tar lan a ni.
Report siamtute zinga hotu ber, centrist Senator Renan Calheiros chuan an panel-in President Bolsonaro-an a mihringpuite laka sual a khawih hi a \ul chuan International Criminal Court (ICC)-ah pawh an thlen tur thu a sawi.
Brazil hi ICC dintute zinga mi, Rome Statute an tiha tel niin an thu thehluh hi international court-ah ngaihtuah theih a ni.
Hetih rual hian ICC-a thehluh hi thu a kal rei thin a, ngaihtuah zui chi a nih leh nih loh ngaihtuah phawt a ni a, pawm a nih hnuah kalpui chauh tur a ni.
A mihringpuite laka a chet dana ti dik lova puh bakah Senate committee chuan Brazilian court puhna dang pariat an nei bawk a. Heng zingah hian sorkar pawisa hmang dik lo leh hripui chungchang dik lo taka thehdarha puhna pawh a tel.
Phek 1,300-a chhah report-ah hian corporation pahnih leh mi 77-te pawh thil dik lo tia puh an ni a, an zingah hian president fapa pathumte pawh an tel.
Senate-in an chhuina hi an ram sanaa Nilaini chawhma (India-ah zan rei) hian prosecutor-general hnenah thehluh rin a ni a. Ngun taka an zira an enchian tur thu a pisa chuan an sawi tih Associated Press chuan a tar lang.
Bolsonaro-a hian an rama hripui a len tirh atangin engah mah a ngai lo lui tlat a, mi tam takin an thih phah anga ngaih a ni a. Hei hi roreltute pawhin mi thihnaa mawhphurtua an puh chhan a ni.
March thla khan Brazilian-te chu Covid-19 an rilrua dah tawh lo turin a ti a, hei hi a hma lawka ni khata thi an tam ber tum an tawn hnu lawka a sawi a ni.
Covid-19 chungchangah hian social media-ah thu dik tawk lo a thehdarh nasa hle bawk a. Thawhtanni maiah pawh video a tar lan chu Facebook-in an paihsak a, hei hi Covid-19 vaccine leh Aids inzawm anga tar lanna a ni.
YouTube pawhin a video pawh danchahsakin Bolsonaro-a channel hi chawlhkar khat chhung khawih theih lohvin an ti nghal bawk.
Bolsonaro-a erawh chuan a sorkar chuan hripui a len tirh atanga hma an lakna chu a dik chat chat zel tih a sawi a, amah tantute pawhin Senate-in a puhnate chu ‘politics-a inbeihna leh inthlan tur thlira thiltih vek’ niin an puh.