Arsenal in Leeds United lakah goal hnih an khung a, English Football League Cup-ah hnehna changin quarter-finals an inhlangkai.
Thawhlehni zanah Emirates Stadium ah Premier League club pahnihte an inkhel a, coach pahnihten squad thlak kual nan hun hmang mahse Gunners player ten huntha an neih an hmang tangkai.
Gunners an che tha tluang
Arsenal tan Eddie Nketiah chuan goal a khung a, substittute Calum Chambers chuan goal dang khung bawkin Gunners in inkhel an dahtha.
Leeds United hi goal hmahruai luh hma in team hlauhawm zawkah an tang a. Gunners tan first team a hmun chang tam lo Ainsley Maitland-Niles, Mohamed Elneny leh Eddie Nketiah te bul tantu zingah an tel.
Minute 55-naah dah luh a nih veleh Chambers-a’n goal a khung nghal a, hemi hnuah hian Arteta pawlte hian inrintawkna nen khelin a chan tha zawkah an chang tluan a. A tawp dawn lamah Gunners forward fing leh che rang Nketiah chuan Illan Meslier goal-ah a khung.
Gunners hi an match hnuhnung pariat atang an tlawm tawh lova, record an neih thatna inelnaah tun season-ah thleng thui leh turin beiseina thar an insiam.
An goalkeeper Bernd Leno chuan Jack Harrison-a goal khung tur a dang tha a, lehlamah Marcelo Bielsa pawlte tan Daniel James chu player langsar berah a tang.
Arteta thukhawchang
Arsenal manager Mikel Arteta chuan a forward kum 22 mi chungchang a sawi a, khelhna hmun a chan tam loh avangin Crystal Palace nen sawizawm a ni thin a, tun season zawhah hian contract a hmang zo dawn.
“Player tha tak a la ni dawn tih hi ka chiang a, Arsenal-ah a nih ngei ka beisei. Kan zingah, kan player a ni hi ka lawm a, a theihna hi kan dahsang a, chuvangin kan hnena cham zel turin kan duh.”
“Tun nipuiah a contract chungchanga inbiakna chu midangte ang bawkin Covid vangin a khaihlak ve thova. Kan chinfel ngaite zingah a tel. Amah bikah chuan a theihna hi han rinhlelh tur a awm lo. Kan mamawh ang apiang alak atangin kan hmu a, a thlen chin atanga hmasawn a duh hle.” tiin a sawi
Kepa leh penalty bawk
Chelsea in Carabao Cup quarter-final luh nan penalty shootout an mamawh a. Premier League club Southampton nen 1-1 a an inhnehtawk hnuah 4-3 in penalty shootout-ah an chak.
Saints tan Theo Walcott leh Will Smallbone ten an penalty an khung lova, Chelsea tan Reece James chuan an chakna tur penalty a khung.
Chelsea in Premier League a goal sarih khungtu team atangin mi paruk an thlak a. Saints in player pakua an thlak danglam thung.
Player thlak kual an nih angin a tir lamah team pahnihten football hlauhawm tak khel turin hun an mamawh a. Blues lam hi insiamrem hmasa zawkah tangin halftime dawnah Kai Havertz chuan corner atangin goal a khung a. Tun season-ah goal thum a khung tawh.
Chawlhlawk zawh veleh Saints an che ve lehnghal a. Chelsea goalkeeper Kepa Arrizabalaga chuan Kyle Walker-Peters-a ball pet chu man nghet lovin a per hi Che Adams-a’n Saints si phurh sut nan a khung.
Goal an neih ve ve hnuah chak tuma innawrna hmuh tur a awm a, Fraser Forster-a’n mualneitu goal khung tur vawi hnih a dansak a. Lehlamah substitute Shane Long-a’n huntha a neihin goal sirah bak ball a tauh thei lo.
Thla 9 chhung khup hliam avanga inkhel thei lo Smallbone-a’n first team a a kir leh hnuah a inkhel hmasa berah a team a chakpui teuh a. Mahse Kepa bawkin a team a chhanhim a. Lyanco leh Mohammed Salisu goal khung tur a dang zui leh bawk.
Chelsea boss Thomas Tuchel chuan, “Football inkhel hautak tak a ni a, inbuatsaihna kan neih dawn laiin César Azpilicueta, Andreas Christensen leh Ruben Loftus-Cheek te inhliam avangin an tel ve thei lova, hei hian kan ruahmanna a nghawng.”
“Inkhel inhawng a ni a, a hautak a. Mahse team thar ang deuhthaw kan rem chunga kan tum ram kan thleng hi kan lawm.” a ti a.
“Kepa-a’n penalty vawikhat a save a, a dang pakhat an vanduai a, mahse team pahnih penalty pet pawh a tha hlawm viau in ka hria.” a ti bawk.
Southampton boss Ralph Hasenhuttl chuan, “Inkhel hmuhnawm, Cup inkhel dik tak a ni. An tan zan awlsam nih tir loh kha kan thupui a ni a, kan hlenchhuak in ka hria. A chak zawkah kan tang thei lo erawh a pawi a, mahse ka team te ka chhuang hle.” a ti ve thung.