Thangtea’n ZMC-ah lab leh director quarters thar hawng


ZMC, Falkawna Genome Sequencing Laboratory leh director quarters thar chu nimin khan Health Minister Dr R Lalthangliana’n a hawng.
ZMC-a Genomic Sequencing Laboratory chu PATH (Programme for Appropriate Technology in Health), Seattle, USA-in US $ 52,000 (Rs. nuai 38) an rawn pek hmanga din a nih thu sorkar thuchhuahin a tar lang a. Genomic Sequencing Laboratory chu India hmarchhakah – Dibrugarh, Imphal leh Shilongah-te a awm tawh thu leh ZMC-a mi chu a palina a nih thu a tar lang.
Genomic Sequencing Laboratory chu Virus Research & Diagnostic Laboratory (VRDL) building-ah dah a nih thu sorkar thuchhuah chuan tar langin, he laboratory-ah hian virus strain chi hrang hrang COVID leh COVID ni lote, drug resistant genes in bacteria te, cancer genomics, HLA typing etc., te hmuchhuah theih a nih bakah zirchian theih a nih tur thu a tarlang bawk.
Sorkar thuchhuaha a lan danin health minister-in nimin veka a hawn ZMC director quarters chu state sorkar Rs. vaibelchhe 1 senga sak niin, Zothan consultancy services-in April ni 30, 2020 ah a sak hna \anin July ni 7, 2021 ah an sa zo a ni.
Health minister chuan ZMC-a zirlaite mipa leh hmeichhia 100 ve ve awm theihna tur hostel chu kumin chhunga sak zawh fel beisei a nih thu sawiin, mipa leh hmeichhia 100 ve ve awm theihna tur tho hostel dang pawh ‘reilo teah sak \an a ni dawn’ tih a sawi.
Administrative building kumin chhung ngeia sa zo tura theihtawp chhuah a nih thu a sawi bawk.

Leave a Reply

Your email address will not be published. Required fields are marked *

error: Content is protected !!