Touring accessories thar nen Bajaj Dominar 400 thar tlangzarh

auto corner
by Ruata

Touring accessories thar nen Bajaj
Dominar 400 thar tlangzarh

Bajaj Auto chuan 2022 Bajaj Dominar 400 chu zinpui tinuam lehzual tur, touring accessories thar nen an tlangzarh a. Heng accessories te hi Bajaj-in Dominar-ah hian an la siam tel ngai lova, mi tam takin after market modification hmanga an vuah belh thin leh an lirthei khalhtuten an duh tih an hriat vang ni thei turin tunah hian heng hmanrua te hi Bajaj chuan an rawn siam tel ta a ni.

Eng nge kan hmuh dawn?
2022 Bajaj Dominar 400 tlangzarh tak hi Rs nuai 2.17 (ex-showroom, New Delhi) man tur a ni a. He bike hi windshield lian tha tak, CFD technology hmanga duan, thli chak takah pawh himtheihna tur ‘wind-blast protection’ leh a khalhtu tana nuam lehzual tur a ni dawn niin company chuan an tarlang.

2022 Bajaj Dominar 400 hian jet-fighter inspired an tih, handguard, flexi-winglet awm tel a nei dawn a. A accessory kit-ah hian luggage carrier leh back stopper te a tel dawn a. Engine bash plate thar, metal skid plate awm tel a nei dawn bawk a, hei hian insut leh thildangah a bike, a bik takin a khawl bawr a venghim tha viau dawn a ni.

Bajaj Dominar 400 thar hian leg guard thar tha tak a nei dawn a, hei hian a lirthei leh a khalhtu chu chetsual palhah pawh a venghim tha viau dawn a ni. Dominar tharah hian cast aluminium-built navigation stay a awm tel dawn a, hei hi kawng kawhhmuhna hmanrua ‘navigation device’ niin rem takin khawhawi a tihbuai lohna lai turah felfai takin Bajaj chuan an vuah a ni. 2022 Bajaj Dominar 400-ah hian USB charging port a awm bawk. 2022 Bajaj Dominar 400 hi rawng chi hnih – Aurora Green leh Charcoal Black

A khawl
A khawl lamah chuan 373.3cc single-cylinder liquid-cooled DOHC fuel-injected khawl a hmang a. He khawl hian 40PS power leh 35Nm torque a pechhuak thei a. Transmission lamah chuan 6-speed gearbox a nei a ni. Suspension lamah chuan a hmalamah 43mm USD fork a hmang a, a hnunglamah monoshock a hmang leh dawn bawk a ni. Dominar thar hian a hnung leh hmaah disc brake, dual-channel ABS system awm tel a hmang dawn bawk a ni.

Company lam..
An tlangzarhnaah hian Bajaj Auto Limited-a Head of Marketing, Narayan Sundararaman chuan Dominar 400 chu bike ngainatu ngah tak a nih thu leh, khawpui chhung veivah nan leh zin nana hmangtu an tam thu a sawi a. A neituten a bike theihna nasa taka an phochhuah thu leh hei hian an bike chu nasa lehzuala heng an lirthei ngainatute tana thuam tha tura phurna a pek thu a sawi bawk.

Bajaj Auto chuan vawiin hian Bajaj Pulsar 250 thar an tlangzarh dawn bawk a. He bike hi version hnih – naked leh semi-faired a awm dawn a, a khawl leh a design-ah thil thar tha tak tak kan hmu dawn a ni. Reports thenkhat chuan Pulsar 250 tharah hian engine platform thar leh VVA (variable valve actuation) technology kan hmu thei dawn niin an tarlang a, vawiina an tlangzarh hunah a chiang dawn a ni.

A khawl lamah chuan 249cc, single-cylinder, oil/air-cooled engine, 24bhp power leh 20Nm torque bawr vel pechhuak thei a hman beisei a ni a, hei pawh hi an tlangzarh hunah chiang lehzualin kan hre dawn a ni.

Leave a Reply

Your email address will not be published. Required fields are marked *

error: Content is protected !!