Samajwadi Party leh Suheldev Bhartiya Samaj Party chuan Nilaini khan 2022 Uttar Pradesh assembly inthlanpuiah an thawhdun dawn thu an puang a, an au hlaah ‘Khadeda Howe’ tih hmangin an state atanga BJP um chhuah an tum.
An au hla hi Mamata Banerjee-i kaihhruai, Trinamool Congress-in West Bengal inthlana an au hla, ‘Khela Hobe’ (game on) zulzuia an tih niin Didi kaihhruaina hnuaiah hian hnehna chang lehin BJP an hneh a, a zawna a vawi thum nan sorkar an siam.
“Au hla, ‘Khela Hobe’ chu chu West Bengal-a hmangin Didi-i chuan an state atangin BJP a paih chhuak a. Hetiang bawk hian Uttar Pradesh-ah pawh ‘Khadeda Howe’ (drive out) tiin BJP sorkar hi mipuiin an paih chhuak dawn a ni,” tiin Suheldev Bhartiya Samaj Party (SBSP) president Om Prakash Rajbhar chuan Mau-ah a sawi.
Samajwadi Party (SP) chief Akhilesh Yadav-an an thawh dun dawn thu a puannaa ‘Vanchit, Pichhda, Dalit and Minority Bhagidari Mahapanchyat’-ah Rajbhar hian thu a sawi.
“In khuaah BJP hruaitute an lo kal chuan thil man sang chungchang lo sawipui ula, in khua atanga chhuak turin lo ti rawh u,” a ti.
Yadav pawhin SP leh SBSP rawng, a sen leh a eng inpawlh inpumkhat ta chuan tunge Delhi leh Lucknow-ah thinrim dawn tih mi tinin an hriat vek thu a lantir tih a sawi a. SP chief hian hei hi sorkar laipui leh an state-a BJP sorkar a sawina a ni.
“Pu Rajbhar-a hian Uttar Pradesh-a BJP-in thuneihna an channa tur kawng a lo khar dawn a, SP worker-ten an kalh ang,” a ti.
“Thawhhona karah hian tu party-in nge bial la tam zawk tihte sawi a awm thin a; mahse, tanho hian a lian na na na chu tumahin an dal thei ngai lo,” tiin Yadav chuan a sawi.
Uttar Pradesh assembly inthlan hi February leh March, 2022 vela neih tura ngaih a ni a, member 403 thlan tur a ni a. Tuna sorkar kal mek hi kum 2017 inthlana chakte kha niin an hun hi May 14, 2022-a tawp tur a ni a. Inthlan hnuhnung berah khan BJP chuan sorkarna siamin Yogi Adityanath chu chief minister a ni mek.