HMEICHHE HUANG
A tap leh ta! engtinnge ni ang?
naute a tah hian nu leh pate’n engtia tih tur nge tihah thu dik tak hi an hre mai thin lova, an buai ve nghal nak thin. Kawng lehlamah, a tah apianga thlem emaw, pawm ziah khan, nakin zelah i laka phut leh ‘ngen’ a neih hunah tangkai takin a hmang lovang tih a sawi theih lova, thil buaithlak ve ang reng tak chu a ni.
Lehlamah chuan, i thlem lo emaw i ngaihsak loh chuan, amahah inthlahrunna leh ngaihsaktu nei lova inhriatna te, midang tluk pha lo anga inngaihnate hial awm thei a ni a, tihngaihna tak a vâng khawp mai.
A mut theihnan tanpui rawh
Naute hi a mut a chhuahin a tap mai thin a, i tah tir char char a nih chuan, a chau anga, a tawpah chuan a muhil nghal bawrh bawrh ang.
Hei taka hi nu leh pa tam takte’n an kalpui dan leh pawmdan a ni a, mut an duh ve tho bawk si a, a tah vak vak kha pawi tihna em em an nei hran lem lo.
Amaherawhchu, mut chhuah vanga a tahna hi tah der na ang chi kha a ni lo thung a, ‘pawm’ a beisei vang emaw ‘duat’ a thlakhlelh vanga tap a ni lova, a chhung-ril atanga lo chhuak tak tak kha a ni zawk.
A mut a chhuak ngawih ngawih a, nuam a tichiah lova, engnge a tih ang a hre bawk si lo a ni. A tah tam poh leh, a chauh a zual dawn a, hah tawngkhawng na na na chu tui takin a muhil mai dawn a ni.
Tah tir vak vak suh
Sawi tam a ngai lem lova, naupang muthilhnan ti-a, a tah pawha thlem duh lohna hi thil tha ber a ni lo hrim hrim tih hriat a tha. A tah chuan duat taka pawm tur a ni a, amah hnemtu leh ngaihsaktu a mamawh em em a ni.
Nuam an ti a, an puar anih bawk chuan mut an harsat lem lova, thil buaipui lai lakkawh a awm anih pawhin en liam mai mai chi a ni lova, a chauh hun nghah phei chu thil tih chi loh tak a tling.
A mamawh hriat tum rawh
Tlakchham leh mamawh a neih avangin naute hi an tap thin a, pawm an duh vang emaw puak an thlakhlelh vangte thlengin a ni thei tho bawk. I chhia leh tha hriatna atang khan a tah chhan zawn chhuah tum fo ang che.
Zun/ek a cheh te pawh a ni thei a, a lum lutuk emaw a vawh lutuk vangte pawh ani thei. A hrisel tha pangngai anih chuan ‘sweater’ a hak kher a ngai lem lo. A ril tam vang a ni thei ang em?
Ni e, riltam hi naupangte tah chhan lian ber a ni fo. Tun maiah khan hnute tui i pe tawh na a, darkar khat leh tlem a ral hnu-ah chuan a ril a tam leh mai ang i ti a ni mai thei a, mahse a dik chiah lo.
A tah chuan, hnute tui pek tur. A riltam chuan a hne nghal mai ang. Naute pianghlim phei chu pek hun leh hun loh tur bithliah vak hi a tha ber lo.
A duh phawt a, a in theih phawt chuan pek char char zawk tur a ni. A lo lian telh telh anga, hnek hun leh mamawh hun kha chu a hrechho ve nghal mai ang. Engtik lai mai pawha a tap deuh reng anih a, kawng hrang hranga inbuaipui pawha a bâng thei lo a nih bawk chuan, mangan chiamna tur a awm hran lo.
A bulah awm la, duat takin pawm la, rilruhah leh tawt taka awm loh a tha. Hahdam taka awm tum la, rimawi ngaihthlak nuam leh i duhzawng tak play la, a tam thei ang berin hun hman pui ang che.
Phur hluai leh buai phili na tur engmah a awm lova, naupang thenkhatte hi an kum rual-pui zingah pawh tah belh leh tah ching hi chu an awm ve hrim hrim a, chu chu thil pangngai tak a ni.
Thil pawimawh tak pakhat erawh hei hi a ni: A taksaa danglamna leh tunhmaa awm ngai lo- pân, hliam, pem leh bawl ang chite a awm anih erawh chuan, ‘a ve tur reng’ a ngaih nghal tawp tur a ni lova, doctor thurawn lak a, entir vat hi a tul a ni mai lova, a pawi-mawh em em a ni.