India hmarchhaka Tripura-ah mosque leh Muslim-te hmunhma suasamna a thlen hnuah boruak a tang hle.
Venhimna tihkhauh lehzual niin buaina chhuahna hmunah chuan punkhawm pawh khap a ni mek.
Tharum thawhna hi Hindu pawl leh police innawr atanga chhuak a ni.
Hindu pawlte hian ram thenawm, Bangladesh-a tun hnaia Hindu-te kutthlak an nih duh lohna lantir an tum chu police hian an phal lo va, an innawr ta niin an sawi.
Hindu sakhaw mi tlemna, Bangladesh-ah hian an sakhaw hunpui, Durga Puja lai khan a lawmna hmun pakhatah Muslim lehkhabu thianghlim, Quran suasamna a thleng nia sawi a awm avangin Muslim-te chuan Hindute chenna leh an sumdawnna hmunte an hal a, an temple-te an suasam bawk a. Mi pasarih vel an thi.
Tripura hi Bangladesh-in kil thuma a ri niin kil dangah hian Assam nen an inri ve a. Kum 25 zet Communist-ten ro an rel hnuah India-a rorel lai, BJP chuan kum 2018 atang khan thuneihna an chang ve thung.
Ni li liam ta chhung khan North Tripura district-ah sakhaw thila tharum thawhna tum 10 chuang a thleng nia sawi a ni.
Thawhlehni zana ramri khua, Panisagar-a Muslim-te dawr eng emaw zat leh an mosque suasam a nih hnuah venhimna khauh lehzuala kalpui mek a ni.
Hetianga Muslim-te beih an nih hma hian Hindu sakhaw la runthlak pawl, Vishva Hindu Parishad (VHP) chuan kawng an zawh a, anni hi BJP nena inhnimhnai tak an ni nghe nghe.
Panisagar-a police hotu, Soubhik Dey chuan kawng zawhnaah hian mi 3,500 vel an tel niin a sawi.
“Kawng zawhnaa tel VHP mi eng emaw zat chuan Chamtilla venga mosque an suasam ta a. A hnuah mosque atanga pen 800 vel chauhva hla, Rowa Bazar-a chenna in pathum dawr pathum an suasam leh a, dawr pahnih phei chu an hal a ni,” a ti.
Police chuan dawr leh in suasamte hi Muslim mite ta a ni a, an zinga pakhatin complaint a thehluh angin thubuai an ziak lut tih an sawi.
Hindu pawl dang, Bajrang Dal-a tual chhung hruaitu pakhat, Narayan Das chuan an zinga thalai hawklak zualten mosque hi an suasam a, ngunhnamin an hmuh remchan an sat bawk niin a sawi a. A thil sawi hi a tak ngei a ni em tih erawh hriat a ni lo.
Tripura police hian mi thenkhatin boruak inmung mek karah hian social media-ah thu dik tawk lo an vawrh darh nasa niin Twitter-ah an tar lang a. Mipuite chu hetiang lo awih lo tur leh boruak tichhe zawnga awm lo turin an ngen.
Kar hmasa khan Muslim pawl, Jamiat Ulama-e-Hind chuan Muslim tamna venga mosque leh mi thenkhat chu mipuiin an sawisa niin an lo sawi tawh a. Tripura police chuan state chhunga mosque 150 chuang chu venhimna pek a nih thu an sawi.
Tripura-ah hian mi maktaduai 4.2 vel chengin heng zinga 9% pawh tling mang lo hi Muslim an ni.
“Tripura-a cheng tam zawk hi tuna Bangladesh ni taa Hindu awm thin, raltlana lutte an ni a, tun hmain sakhaw inan loh avangin Muslim nena an inkarah a awm ngai lo,” tiin Tripura-a ziakmi pakhat, Bikach Choudhury chuan a sawi.
Eptu party-te chuan BJP nena inhnimhnai tak pawlin Muslim an bei chiam chu politics-a thangthat lak tumna niin an sawi.
Trinamool Congress MP Sushmita Dev chuan BJP chuan tun hnaia Bangladesh-a tharum thawhna thleng chu November thlaa municipal inthlan lo awm tura vote an hui theihna tura hman an tum niin a sawi.
Dev-i hian Tripura Minority Affairs’ Minister Ratanlal Nath chu thil thlengah hian che chhuak turin a phut bawk.
Hetih lai hian a hming tar lan duh lo BJP hruaitu pakhat chuan eptute hian Bangladesh-a Hindu-te tawrhna thleng chu remchanga lo hman ve phet tum lo turin a ti let ve bawk.
Sorkar chuan boruak a muanawm theih nan a tul ang chu a ti mek zel tih a sawi bawk.
Chhuitu tur din
Tripura-a rorel lai, BJP chuan Thawhlehnia Panisagar sub-division-a mosque leh dawr suasam leh halna thleng chhuitu tur member panga awmna committee a din tawh.
Police-te chuan he thil thlengah hian VHP mi eng emaw zat an tel ngei niin an lo sawi tawh bawk.
VHP nen hian inhnimhnai hle mah se BJP chuan thil thlengah hian inrawlhna engmah an nei ve lo tih an sawi.
Tripura atanga BJP MP leh an state incharge Vinod Sonkar chuan an party chuan thil thleng chhui chiangtu tur committee an din tawh thu leh member-ah hian hnam leh sakhaw zuitu tlem zawkte pawh an tel tih a sawi bawk.
“Committee hi tharum thawhna thlenna hmunte tlawh tura tih an ni a, ni hnih thum hnuah report an thehlut ang a. Eptute hian tan lam neia min ngaih tlat avang hian a chhui hna thawk tur pawh hian hnam leh sakhaw zuitu tlem zawk mite ruat an ni,” a ti.
Kartawpa Tripura tlawh tur, Sonkar-a hian tharum thawhna thleng a ni lo zawnga vaw lianah puhin Trinamool Congress (TMC) chu a dem thu a sawi.
Tripura-a bu khuar tum mek, TMC chu an state-a sakhuana thila tharum thawhna thleng chu politics khelh nana hman tumah puhin kum 2023-a assembly inthlan an hmabakah remchang atan hman tum tlatah a puh.
“TMC hian Tripura-ah hian innghahna engmah an nei lo va, tu party worker mahin an zawm duh lo va, hei vang hian sakhuana thila buaina awmte hi remchangah hmanga inlak len nan leh intihlar nan hman an tum a ni,” a ti.
Sonkar-a hian BJP hruaitu thenkhatin TMC an zawm dawn nia sawi awm pawh a pha nghal a. “Party chhungah inpawhna leh buaina engmah a awm lo. Party-ah emaw, sorkarah emaw pawh, lungawi lohna nei an awm pawhin party chu an chhuahsan phah chuang lo vang,” a ti.
Hetih lai hian Sonkar-a ngei pawh hi TMC nena sawi zawm an lo ni tawh a, ani hi ram leilung fate tana Tripura atanga state hran siam duhtu niin BJP thawhpui, Indigenous People’s Front of Tripura nen an duh dan a inang a ni.
“TMC hian Prime Minister Narendra Modi-an hun rei tak ata tawh Tripura-a tribal-te tana harsatna awm a siam thatzia an pho lang mai mai a. Tribal leh Bengali Hindu atangin thlawpna an hmu dawn lo,” a ti.
Congress-in duh lohna lantir
Tripura Congress chuan an state chhunga hnam leh sakhaw zuitu tlem zawkte beih an nih duh loh lantirna, ‘Gana Dharna’ (mass protest) chu Agartala-ah an huaihawt.
Congress hian Agartala-a Congress Bhawan-ah duh lohna hi huaihawtin tharum thawhna thlenga a bultumtute man chhuaha hremna pek ngei an phut.
A hmain Tripura Congress chief Birajit Sinha chuan an state-a BJP sorkar chuan tun hnaia sakhaw zuitu tlem zawkte beih an nihah ngawih a chuh tlat a, an rorelna hmunah hetiang hi a thleng tam niin a sawi.
“BJP-in mi a kaihhruaina apiangah dan leh thupek kenkawh a hlawhchham thin,” tiin Tripura Congress chief chuan a sawi.
Tun hnaia Tripura-a hnam leh sakhaw zuitu tlem zawkte rawng taka beihnaa a mawhphurtute chu hremna pek ngei an phut tih Birajit Sinha chuan sawiin, state sorkar chu he thil thleng avanga vakvaia awm mek chhungkuate tuamhlawm ngei turin a ti.
Tar lan tawh thin angin Thawhlehni tlai khan North Tripura district-a Panisagar sub-divisionah Hindu pawl pakhat, Vishwa Hindu Parishad-in kawng an zawh laiin Muslim-te sakhaw hmun, mosque suasam niin an chenna in leh an dawr pawh suasam leh hal a ni.
“Tripura-a hnam leh sakhaw tlem zawkte rawng taka khawih hi kan dem a. A titute chhui chhuaha hremna pek leh a tuartu chhungkuate tuamhlawm ngei kan phut tlat a ni,” tiin Tripura Congress chief chuan a sawi.
“Chawlhkar khat liam ta chhung khan BJP-in a tanrualpui pawl tam takin tun hnaia Bangladesh-a sakhaw zuitu tlem zawk, Hindu-te tawrhna thleng duh lohna an lantir a, hetianga duh lohna lantir hi buaina tur engmah awm lo a ni. Hetih lai?hian Tripura-a sakhaw zuitu tlem zawkte kutthlaka Bangladesh-a thil thleng phuba lak nana hman hi chu thil pawmzam mai mai chi a ni lo,” tiin Tripura Congress chief Birajit Sinha chuan a sawi.