China chuan khawpui lian lo deuhva in chhawng sang tak tak (super high-rise building) sak a phal tawh dawn lo.
He ram hi khawvela in chhawng sang ber ber awmna niin heng zingah hian chhawng 128 zet nei, Shanghai Tower pawh a tel.
Tual chhunga titi hrang hrangah khawpui lian lem lo, mihring pawh an bit lem lohnaah in chhawng sang tak tak sak a tulna chu inzawh a ni fo va, intihropui duhna mai mai niin an ngai.
A hma pawhin in chhawng metre 500 aia sanga sak an lo khap tawh.
Sorkarin in chhawng sang tak tak sak a khap ta hi mipui pawhin an pawmpui hle a. Chinese social media site Weibo-ah pawh tha an tih thu an tar lang nual a. Hetiang in chhawng sang hi ‘mamawh loh leh mahni infakna mai’ a nih thu an tar lang hlawm.
Kumin kum tir lamah khan China-ah hian in pian mak pui pui sak an lo khap tawh bawk.
Tongji University-a College of Architecture & Urban Planning-a an deputy head Zhang Shangwu chuan an ram mipuite chuan rilru sukthlek danglam, thil mawi leh tha tih tih mai duhna rilru an pu niin South China Morning Post hnenah a lo sawi tawh.
“In sak apiang hi chhinchhiahna atana sak tum a ni a, a saktu leh khawpui duangtute pawhin engtin emaw taka mak leh danglama tih an tum ta zel a ni,” a ti.
Thawhlehnia housing & urban-rural development leh emergency management ministry-in thuchhuah intawm an siamah mi maktaduai thum chen tlin lohnaah chuan in chhawng metre 150 aia sang sak phal loh a nih thu an tar lang.
Heng aia tam mihring chennaah pawh metre 250 aia sanga sak khap a ni bawk.
Ministry chuan mihring cheng maktaduai thum tlin lohna hmuna a aia sang sak tul a awm chuan ngaihhnathiamna an pe thei a; mahse, kalpui kual duah a ngai ang.
Hetih lai hian metre 250 aia sang sak phalna pek theih a nih leh nih loh erawh an tar lang lo.
Khawpui lian zawk, mihring maktaduai thum aia tam chennaah hian metre 250 aia sang sak phal a ni sa a, metre 500 aia sang erawh phal a ni lo.
Khapna bawhchhia chu dam chhunga inhremna pek theih an ni ang.