Hun tiam pelh hnua campaig-ner chambang tam tak tir haw


October 27 zan dar 6 khan Tuirial bial bye-election neih tura campaign hun khar ni mah se, party mi leh sa zingah Tuirial bial pawn lam mi, haw duh loa chambang an awm nual a, heng mite hi thahnem tak tirh haw an ni.
Dr H Lalthlangliana, District Election Officer (DEO), Kolasib chuan sector magistrate zawng zawng anmahni station-ah theuh awmin, Mizoram People’s Forum (MPF) nen tangkawpin khua leh veng tinah tlaivarin an duty a, mikhual chambang thahnem tak thawn haw an nih thu a sawi.
“Tuirial bial chhunga chhungte nei thar thut an pungte pawh a ni mai thei. A thei thei kan innawr haw a, haw tura inhrilha haw nghal zel an nih hlawm avangin kan hnawh haw zat erawh chu a sawi mai a theih lo va. ‘Kan inhnawt haw teuh’ tih bak sawi a har a, kan innawr chhuak kim thawkhat chuan kan hria,” tiin The Zozam Times a hrilh.
DEO hian nimin khan bye-election neih turah ‘silent period’ chungchang ‘order’ thar siamin a chhuah a, naktuka vote thlak niah candidate leh an agent-te tih loh political party campaigner vote nei lote chu Tuirial bial chhungah awm phal a nih loh thu leh, Tuirial bial luhna kawngpui hrang hrangah duty siamin vote nei lo political hruaitu leh campaigner, bial chhunga lut turte lo dang tur siam a nih tur thu tar lan a ni.
Hemi chungchangah DEO hian, “Vote thlak ni hian boruak thlithlaia rawn kal tum minister-te pawh an awm thin a. Mahse, minister leh MLA huam vekin, Tuirial bial chhung mi ni lote chu inthlan boruak thlira luh rem tih a ni dawn lo a. Entry gate-ah kan indang dawn a, indan ngai lo turin political party-te pawh lo insum theuh turin kan inhriattir nawn lehna a ni deuh ber,” a ti.
Party hruaitu hrang hrang atangin vote thlak niah Tuirial bial pawn lam mi te tan luh theih leh theih loh zawhna a dawn tam thu DEO hian a sawi a. “Vote nei lo, bial pawn lam miten bye-election neihna hmun an kal theihna hi dan hi kan zawng a, kan hmu lo. An kal theih lohna dan hlir chauh ka hmu a ni,” a ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427