Covid-19: Moscow-ah ni tin mamawh buaipuitute tih loh inkhar


Russia-ah ni khata COVID-19 kai hmuh chhuah leh thihpui an pung zel a, an khawpui, Moscow-ah chuan inkai darh tihtlem nan ni tin mamawh buaipuitute tih loh chu ni 11 chhung inkhar tura tih an ni.
An ram hi Europe-a hripui tuar na ber ni mah se invenna lam erawh mipuiin an ngaihsak lo hle a, an ram ngei pawhin invenna damdawi siam chhuak mah se a la tlemna ram zinga mi a ni.
Tun hnai chawlhkar eng emaw ti chhung chu ni khata hri kai hmuh leh thihpui tam ber ni an tawng zur zut a. Sorkarin a chhinchhiahnaah chuan Ningani pawh khan mi 40,096 zet kai hmuh niin mi 1,159-in an thihpui hman bawk.
Thuneitute chuan ram chhung hmun tam takah inkhuahkhirhna khauh lutuk kalpui an la duh lo va. Hetih lai hian khawpui berah erawh ni tin mamawh buaipui leh zawrhna tih loh chu Ningani atanga November 7 thleng an inkhar tan mek.
Retail outlet, thingpui dawr, infiamna lam leh hlimhlawp thil tihna hmun khar vek a ni a, sikul leh kindergarten an khar bawk a. Ei tur lam, damdawi leh ni tin mamawh dang zuarte chauh inhawn phal a ni.
Russia-ah hian hri kai mi maktaduai 8.4 dawn an awm tawh a, mi 2,35,000 chuangin an thihpui tawh a. Heti chung hian mi thiamte chuan sorkarin hripui hlauhawm dan hi a ngainep tlat niin an sawi.
Statistics agency Rosstat-in October thlaa an zirna an tihchhuahah chuan an ramah hian mi 4,00,000 chuangin coronavirus an thihpui tawh niin an tar lang.
Hripui len tan tirhah khan thla eng emaw zat chhung inkharkhip khauh tak an kalpui a. Hemi hnu lamah hi chuan Russian thuneitute hian ei barin a tawrh em avangin inkhar lam an hawi tawh lo va, Russian-te chu invenna lak ngai pawimawh turin an ti thung.
President Vladimir Putin-a sorkar chuan tual chhuak vaccine, Sputnik V leh a dangte pawh, heng hmang hian an inchhan theih a beisei a; mahse, Russian tam tak chuan inchiu an duh lo hlawm.
Ningani thleng khan Russia-a cheng 32% emaw chauhvin invenna hi a bikimin an la la tih an rama Covid-19 chungchang chhinchhiahtu, Gogov website chuan a tar lang.
Putin-a hian kar hmasa khan hri inkai darh a ziaawm theih nan an ram pumah hlawh la chung sia chawlh puangin October 30 leh November 7 thleng hman tur a ni a. Moscow thuneitute pawhin hetiang deuh bawk hian inkhar an puang zui bawk.
Moscow-ah chuan Ningani khan ni dang ai chuan lirthei veivak pawh a tlem hle a. hetih lai hian Metro erawh a lun reng tho va, a chuang tam tak chuan hmai an tuam lo bawk.
Thueneitute hian Russian-te hi hna chawlh puan chhung hian ina awm turin tumah an ti chuang lo va, tam tak chuan zin khawthawn nana hman an tum.
Black Sea kama intawl lenna, Sochi mayor chuan khualzin an tam dawn tih a sawi lawk a. Turkey leh Egypt pan tur thlawhna ticket pawh an inchuh nasa hle.

Leave a Reply

error: Content is protected !!