Borussia Monchengladbach chuan a tir minute 21 chhungin goal thum an khung a. German champion Bayern Munich chu hneh taka nghaisa in German Cup round hnihna atangin an paih chhuak.
Nilaini zana DFB Pokal round hnihna hi inkhel hi Borussia-Park-ah nghah a ni a. Gladbach in duhthusam a bul tanin Kouadio Kone chuan minute 2-naah goal hmahruai a khung a. Minute 15-naah Ramy Bensebaini chuan khung belh nghalin minute 21-naah penalty atangin an goal thumna a khung.
Second half tan tir lamah Breel Embolo chuan minute 51-na leh 57-naah goal a khung a, hrilhhai tak Bayern Munich lakah hnehna a tichiang.
Gladbach hi Bayern Munich laka kum 2012 German Cup final a Borussia Dortmund in 5-2 a an hneh hnuah goal nga khung leh thei hmasa ber an ni a. German Cup inkhel a Bayern laka a tir minute 21 chhunga goal thum khung thei hmasa ber an ni.
Hei mai hi a la ni lova, Bayern Munich hian kum 1978 December 9 a Fortuna Düsseldorf 7-1 an hneh loh hnua inkhel pakhata goal nga emaw a aia tam a an tlawm leh hmasak ber a ni.
Bayern sports director Hasan Salihamidzic chuan, “A mak zawk a ni, kha inkhelah khan kan tel ve mang lo a ni ber. First half-ah khan ball kan chhuhsak ve thei lova, kan elpha lo a ni ber. Engkim kha a kal dik lo vel vek. Gladbach an kheltha a, keini lam kha kan tel lo tluk a ni.” tiin an inkhel a thlirlet.