English Football League Cup champion lai Manchester City in quarter-final an thleng zo lova. West Ham United in 5-3 in penalty shootout-ah an hneh.
London Stadium-ah entu mipui khat hmaah Hammers in City zinkawng hi an titawp a. Minute 90 chhung goal khung lova an inkhelh hnuah West Ham tan Said Benrahma chuan chakna penalty a khung a. City tan Phil Foden chuan a penalty pet a khung lo.
Season hnuhnung pali chhunga he inelna a champion tawh City hi kum 2016 hnua a vawikhatna atan EFL Cup-ah hian an tla.
London-ah zan duhawm
Manchester City manager Pep Guardiola chuan Brighton & Hove Albion hnehtu team atangin mi pakua a thlak danglam a. Rawlthar Cole Palmer bul a tan tir tih loh erawh a player chhawrte tawnhriat nei tha tawh vek an ni tho.
West Ham lakah chuan a chan tha zawk an ni rei zawk thova, goal shot vawi 25 lai nei mahse a pawimawh ber an tlin tlat lova. Substitute bench atangin Foden, Gabriel Jesus leh Jack Grealish te chakna goal zawngin dah lut zui bawk mahse awmzia a awm lo.
Nathan Ake leh Ilkay Gundogan ten huntha an hloh a langsar a, Hammers keeper Alphonse Areola chuan John Stones-a khung tur a dansak bawk.
David Moyes-a pawlten season tha an hman mek an kalpui zel a, an inkhelh hnuhnung ber atang mi pariat thlak danglam mahse a zawna vawi li na atan inkhelah an goal an venghim a. City lakah an goal ven ngai ngun mahse an khingpuiten a hmawr an bawk tur an veng hneh hle.
Penalty shootout-ah club captain Mark Noble, Jarrod Bowen, Craig Dawson, Aaron Cresswell leh substitute Benrahma ten an khung vek a. Hun pangngaiah Tomas Soucek hmanga an khung teuh bak goal hlauhawm langsar an nei lo.
“Kan lo kir leh dawn”
Manchester City manager Pep Guardiola chuan an tlawm hnuah, “He inelna a kan hlawhtlinna leh kan kaltluan dan hi enlet ila a ropui hle. Penalty-ah kha chuan keini aiin an tha zawk a, West Ham hi an chak avangin ka lawmpui.”
“Keini lamah Phil-a’n a khung lova, mahse hengte hi tawnhriat zel a ni a, hetiang tawn hun hi a awm a, hmasawnna thlentu zel a ni.” a ti a.
“Premier League-ah an che ha a, Europa League ah pawh che tha hle in tunah Carabao Cup quarter-final an lut bawk. Team tha, manager tha hnuaia khel an ni.” tiin an khingpui a fak.
Hammers first-team coach Stuart Pearce chuan, “Player-te hian fak an phu a, anni hi chawimawi tur an ni. Manager hian nitinin he club hi hmalam pan turin a kaihruai thin a, a hnathawh hi a ropui hle.” tiin a sawi.
Champion tura rinkai Reds
Liverpool in Carabao Cup quarter-final tlin nan Preston North End lakah second half a goal hnih khung an mamawh a, 2-0 in hnehna an chang.
Deepdale-ah Reds tan Japanese striker Takumi Minamino leh Divock Origi ten goal an khung a. Round hmasa a goal hnih khung tawh Minamino hian minute 62-naah Neco Williams ball cross a khung.
Championship club hian goal an chhuah hma zawngin an goal an ven dan a fakawm a, mahse goal an chhuah hnuah erawh Liverpool in inrintawkna lian tak an nei a. Minute ruk a la awmin Belgian striker Origi-a’n goal ‘cial’ tak mai a kheng lut.
Manchester United sawptu starting XI chu Jurgen Klopp-a’n chawlh hahdamna hun a pe a, hei vang hian Reds in ball chang hnem mahse chance tha zawk Preston siam a ni a. Chawlhlawk zawhah erawh player theihna inthlau a hmuh theih.
Liverpool manager Jurgen Klopp chuan, “Bul kan chhe lo chungin kan khel tha lo. A tirah nghet mah ila kan pherh thuai a, ball chan kan tum nasat luatah kan tlan darh nasa lutuk a, awmze neiin kan inrem thei lo.”
“Team angin tha zawka kan khelh a ngai a, player malkhaiah erawh kheltha tak tak ka hmu nual. Round dawt leh a tlin hi a pawimawh ber chu a ni a, chu chu kan hlenchhuak. Player 11 kan thlak avangin a awlsam dawn lo tih kha chu a chiang sa.” a ti ve bawk.
Spurs leh Foxes an tling hram
Tottenham in Turf Moor tlawhin Burnley an hmachhawn a. Substitute Lucas Moura goal khung chu chak nan mamawhin 1-0 in an chak.
Nuno Espirito Santo pawlten an inkhel hnuhnung pahniha an tlawm ve ve hnuah hnehna an chang a. Burnley in an si phurh sut tumin Spurs an nawr na a, mahse Tottenham an ding tlang hram.
Leicester City in Brighton hneh turin penalty shootout an mamawh a. Foxes tan Harvey Barnes leh Ademola Lookman te goal khung chu Brighton in Adam Webster leh Enock Mwepu te hmangin hun pangngaiah an sut.