Gov’t. J Thankima College, Aizawl chu Higher & Technical Education department ruahman angin Academic and Administrative Audit Assessor-ten an endik.
College Principal Prof. JV Nunchunga’n endiktute lawmin, Conference Hall-ah institutional report a pe a, hemi zawh hian Economics, Education, Geography, Management, Mizo, English, History leh Political Science department endik an ni a. Vawiinah library, mipa hostel, e-resource centre, indroor sport training facility leh thil dangte endik a ni ang.
Academic & Administrative Audit hi National Assessment & Accreditation Council, Bangalore, advisory note-ah telh a nih avangin higher education institution-te chuan an paltlang a tul a, chumi zawhah NA&AC endikna an hmachhawn leh dawn a ni.
Govt. J. Thankima College hian sorkar sum tel loin kum thum chhungin department pahnih — Management leh Geography a lo hawng tawh a, Management department phei chu an vawi khat university result neihnaah top 10 zinga pali chu he college a mi te hi an ni nghe nghe. Zirlai pawh pung chakin tunah hian zirlai 1028 an an awm mek bawk.
Academic & Administrative Audit hi Mizoram sorkara H&TE department-in ti tura a ruat mi thiam bikten an nei thin a. Govt J Thankima College hi nimin khan Dr. Lalthansangi, Dr. Lalhmingliana leh Dr. Samuel VL. Thlanga ten an endik a ni.