Inthlan buaipuitute thu zawmsak i ching thar leh ang u
Naktuk mai hi Tuirial bial inthlan that hun a ni tawh a, nilaini tlai dar 6 kha campaign theih hun tawp a nih avangin election a thuneitu lam chuan bial pawn lam mite pawh anmahni hmun lama haw tura ngenna an lo siam lawk tawh chungin, innawr haw ngai tam tak an awm thu an sawi a, tan a na tlang a ni ang e.
Kan lo ziah fo tawh angin inthlan kaihhnawih buaipuitu lam an hah viau mai a, dan pela khawsa man an nei nual bawk nen, inthlan ni thlengin harsatna neuh neuh an la nei zel lovang tih lah a sawi theih hek loh. An inpekna leh an hmalakna erawh a fakawm thin hle.
Dr H Lalthlangliana, District Election Officer (DEO), Kolasib chuan sector magistrate zawng zawng anmahni station-ah theuh awmin, Mizoram People’s Forum (MPF) nen tangkawpin khua leh veng tinah tlaivarin an duty a, mikhual chambang thahnem tak thawn haw an nih thu a sawi a, hei hi inthlan campaign tawp nia an hmalak dan tlangpui a ni. Hre sa reng chunga dan zawm lotute hi an demawm hle zawk.
Kolasib DEO vek hian, “Vote thlak ni hian boruak thlithlaia rawn kal tum minister-te pawh an awm thin a. Mahse, minister leh MLA huam vekin, Tuirial bial chhung mi ni lote chu inthlan boruak thlira luh rem tih a ni dawn lo a. Entry gate-ah kan indang dawn a, indan ngai lo turin political party-te pawh lo insum theuh turin kan inhriattir nawn lehna a ni deuh ber,” a ti bawk a, hei pawh hi zawmsak leh zahsak a, kan hriat tur ang a puang turten an puang dawn tho tih hria a, hmalatute hmalakna zahsak hi mipui, mi lian atanga a te ber thleng pawhin kan hriat thar a tha hle mai.