Suheldev Bharatiya Samaj Party (SBSP) leh Samajwadi Party ten an thawhho tur thu an puan hnu lawkah nakuma Uttar Pradesh assembly inthlan lo awm turah party tenau deuh pasarihte chuan BJP an thlawp dawn thu an puang.
SP leh SBSP hruaitute hian Nilaini khan an thawhho tur thu hi Mau-ah puangin 2022 inthlanah hian BJP chu an paih thla dawn tih an sawi.
Bhagidari Sankalp Morcha-a tel zinga lian tak, SBSP leh SP hian November thla chhung hian vantlang inkhawm lian tak vawi riat an huaihawt dawn a. Heng hunah hian SP chief Akhilesh Yadav, SBSP president Om Prakash Rajbhar ten thu an sawi thin dawn tih PTI chuan Ningani khan a tar lang.
Hetih lai hian ‘Hissedari Morcha’ an tih, party tenau deuh pasarih tangrual chuan BJP an thlawp dawn niin saffron party thuchhuah chuan a tar lang.
Party pasarih hruaitute hian Nilaini khan state BJP president Swatantra Dev Singh hnenah lehkha an thehlut niin an tar lang bawk.
Lehkha thehluttute zingah hian Bharatiya Manav Samaj Party atangin Kewat Ramdhani Bind, Musahar Andolan Manch atangin Chandra Vanvasi leh Shoshit Samaj Party atangin Babulal Rajbhar te pawh an tel.
Mi dangte hi Manav Hit Party atangin Krishna Gopal Singh Kashyap, Bharatiya Suheldev Janata Party atangin Bhim Rajbhar, Prithviraj Janshakti Party atangin Chandan Singh Chauhan leh Bharatiya Samata Samaj Party atangin Mahendra Prajapati te an ni.
Kum 2017 assembly inthlanah khan BJP thawhpuitute zingah SBSP pawh hi an tel thin a. Inthlanah khan bial riatah chuhin bial li-ah hnehna an chang a ni.
Uttar Pradesh-ah hi nakum February-March velah an inthlang ang.