ZPM Thalai chuan Mizoram sorkar chu kum 2020-21-a zirlaite scholarship a hrensak pe chhuak thuai turin an ngen.
Nimina Aizawl Press Club-a chanchinbumite an kawmnaah ZPM |halai Senior Vice President Dr C Lalrammawia chuan minority affairs ministry atanga pek chhuah Schedule Tribe-te tana pre & post matric scholarship chu Mizoram zirlai tam takten zirna sang zawk an chhunzawm theihna atan an hmang tangkai hle thin tih sawiin, hetihlaia tun hnaia a hun taka scholarship pek loh leh sum sanction sa pawh state sorkarin matching share a pek theih loh avanga tihkhawtlai a ni fo mai chu hriatthiam harsa an tih thu a sawi.
Dr C Lalrammawia chuan scholarship sum chu central-in zaa 90 tumin, state sorkarin zaa 10 a lo do let ve a ngai tiin, kum 2020-21 atan scholarship lo do letna tur Rs nuai 437.22 chu dilh belh a, pawm thlap a ni tawh tih sawiin, hetihlaia tun thlenga scholarship dawng loa mangang mi sing chuang an la awm chu mak an tih thu a sawi bakah kum 2020-21-a zirlaite scholarship chu a rang thei ang bera pe chhuak turin Mizoram sorkar an phut tih a sawi.
ZPM thalai senior vice president chuan, zirlai ten scholarship an hmuh tura state sorkar in suma a lo do letna tur chu hriat sa a ni tiin, heti chunga kum tin budget pharh a niha zirlaite scholarship lo do let vena tur dah a ni ngai lo leh central atanga lo thleng pawh state sum neih dan azira siam rema supplementary demad hmanga kum tawpa siam rem chawp a ni leh thin chu pawi an tih thu sawiin, “Hei hian sorkarin zirlaite hmakhua a ngaih lohzia a pho lang a ni,” a ti bawk.