TAWNGKAM THILTIHTHEIHNA

TAWNGKAM
THILTIHTHEIHNA

  • Debbie Rinawmi

Kan tawngkam tin mai hian thil a ti thei hle a; pawi a khawih thei a, midang hlimna leh thlamuanna pawh a thlen thei bawk. Engkim hian thatna leh that lohna a ne a. Kan pi leh pu te pawhin ‘tawngkam thain sial a man’ te an lo ti a, an lo hmuchiang hle mai. Engpawhnise, a tha zawnga nghawng a neih lam kha chu midang ziahah lo dah tha ta ila. Midang sawi peih loh, tawngkam uluk loh thiltihtheihna lo chip dawn ila. Khawvela Covid hri a darh tirh khan mipui kan thlaphang em em a, ram hruaitu te kan thlir thup a, an lakah beiseina kan nei lian hle a nih kha. Heng hunah hian mi nawlpui te aia ram hruaitu te pawimawhna a lang chiang hle. Dawt sawi rau rauah pawh ina awm mai mai ai chuan ram hruaituin dawt a sawi hian a pawi dan a pawi nasa zawk a. Chhungkhat chawlhni sa tur ei ruk ai chuan ram hmasawnna tur sum eiruk chu a pawi dan a pawi nasa zawk hle bawk.

DONALD TRUMP-A TAWNGKAM THILTITHEI CHU
Donald Trump-a’n Coronavirus chu “Chinese virus” a tih khan khawvel a deng chhuak nasa hle a. March 16 atanga 30 chhung khan vawi sawmhnih aia tam mah a sawi hman lehnghal! Chu a tawngkam chuan buaina a chawk chhuak nghal pang mai – Asian-te ngaihtheih lohna a hring nghal a, a nghawng a nasa hle. Thil namai lo tak a nih avangin chhuahchhalh a tawk hial reng a, ani lah chuan China atanga rawn intan a nih avanga sawi maiah a inchhal a, a nghawng a nep phah hauh si lo. Aw, tawngkam thiltithei!

USA LAMAH CHUAN…
Khawvel ram hruaitu azawnga huhang ngah USA President ka meuh atanga a chhuah tak siah chuan khawvel hmun hrang hrangah Asian-te ngaih theih lohna a awm thuai a. USA-ah pawh buaina tam tak a chhuak a, hri a len tirh lam ringawtah pawh khan Asian te huatna avanga buaina report case 100 lai a awm a ni. Chung ang buaina chu a hluar tak zel avangin Asian Pacific Planning and Policy Council te, Chinese for Affirmative Action te leh San Francisco State University hnuaia Asian American Studies Department te tangkawp chuan hmalakna ‘Stop AAPI Hate Reporting Center’ chu March 19, 2020 khan chi inthliarna avanga Asian American te buaina hmachhawn turin an nei ta rup mai a, hna pawh an ngah chak hle.

HAMARA DESH AH PAWH…
Kan ram India pawh a rawn kangkai vat a. A tuartu chu tlang mi Northeast ho kan ni, khawchhak hmel kan put miau avangin. He buaina hi he hriin a thlen thil thar a ni lo va, thu mu hnu a kaitho mai zawk a ni. January 29, 2014-ah khan Arunachal Pradesh mi Nido Taniam kha Indian hmel a put loh avangin Lajpat Nagar, Delhi-ah vuak hlum a lo tawk tawh a. Kum 2016-ah pawh Bangalore-ah Mizo thalai pahnih chu an khawtual tawng an hman loh avangin na taka sawisak an lo tawk tawh a nih kha.
Mizoram awmna hre lo pawh an awm nawk a, ‘Nepal-ah em ni a awm?’, ‘Bangladesh-ah em ni a awm?’ ti tawk lah bo lo. Tlang mi chu ‘chinky’ emaw ‘chini’ emaw ‘Nepali’ emaw ‘Chinese’ tia koh nawmnah kan ni fo a, ‘chinky’ tih hi a tlanglawn ber a ni awm e. Cambridge International Dictionary of English chuan he thumal hi British hoin Chinese mi an sawina tawngkam mawi lo tak a ni tih a sawi a, chumai bakah ‘chink’ tih pawh hi Webter’s New World College Dictionary, New Millennium leh Oxford Advanced Learner’s Dictionary of Current English te chuan Chinese mi te sawi nana tawngkam zahawm loh tak a nih thu an tar lang bawk. A enga pawh chu nise, hming mawi leh zahawm tak chu a ni lo phawt. Hei mai bakah hri a len khan Mizote ngei pawh mahni ram panin ka haw nguah nguah a, chutih laiin zirna leh hnathawhna emaw thil tul dang (damlohna pawh a ni thei) avanga phai lama tangkhang an awm nual a. Chung tlang mi chambang ho chuan hri avanga buaina piah lamah enhranna an tawk nasa em em a. An in luah atanga hnawh chhuah an ni a, hmun hrang hranga an kalna turah dan te pawh an awm a, an hna atanga ban hial te pawh an awm a ni awm e. Thil thleng pahnih khat lek han tarlang ila. Indian Prime Minister-in Janata Curfew March 22, 2020-a a puan hnu lawkah khan Delhi University hnuaia Manipuri M. Phil zirlai chu chawhmeh lei turin a bazar a, a kalkawngah chuan pa pakhatin ‘corona’ tia au nawmnahin a kuhva ei lai a chhak khum nghe nghe. Ahmedabad-ah pawh Northeast nula thian ho chu a luah man an pek lawk diam kha a neitu te’n chhuak turin an ti thut a ni.
Case report pawh hi sawi sen loh khawpa tam a awm a, report ngam lo pawh tam tak an awm a ni. Porvorim, Goa-ah pawh nu pakhat leh a fate’n Northeast nula te kutthlakin an bei chiam a. Local police te lahin complaint file lo turin an vau zawk daih mai si, National Commission for Women-in an bawhzui nghe nghe. Heng buaina tar lan tak te hi a tawktu leh tuartu tan chuan taksa mai bakah rilru leh ngaihtuahna thlenga nghawng zui tu an nih avangin a pawi hle a, rilru lam natna pawh a ti hluar hle a ni. Heng chi inthliarna avanga buaina te hian Indian Constitution-a Fundamental Rights (Article 14 atanga 21) in mihring dikna chanvo a sawi te chu kalh tlat mahse a tuartu kha hmeichhia a nih loh phei chuan police te’n eng IPC (Indian Penal Code) hnuaiah nge an ziah luh ang tihah ngawt pawh an buai thin, chi inthliarna avanga hremna dan mumal a awm loh avangin.
Heng a chunga tarlan te hi huatna leh tawrhna chawh thawh tuma tar lan an ni lo va, tawngkam pakhatin nghawng a neih thui zia tar lanna chauh a ni. Donald Trump-a angin mi hneh theihna kan ngah lo pawh a ni thei, amaherawh chu, kan tawngkam tin te hi an nung a, nghawng eng emaw tal an nei vek a ni. Khawvela tawng lam zirna linguistics leh Pathian thu lam atang pawhin a dik chiah mai. I tawngkam hmangin tawrhna i thlen thei a, chutiangin malsawmna pawh.

Leave a Reply

error: Content is protected !!