PHE Department leh Central YMA-in tuihna humhalh leh fai leh thianghlim kawnga thawh dunna an lo neih tawh chu kum li dang atana chhunzawm leh turin thuthlung an ziak.
Nimina PHE Engineer-in-chief pisaa thawhdunna thu an thlunnaah PHE Department aiawhin Engineer-in-Chief Lalremsiama’n hming a ziak a, Central YMA aiawhin President Vanlalruata’n a hming a ziak.
Engineer-in-Chief chuan tuihna humhalh humhalh kawngah hian Central YMA nen kum 2012 atang khan thawhdunna an nei tan tih sawiin, an thawhdunna hian rah tha a chhuah zel a, tuikhur hnar leh tuihna siam theitu humhalh a ngaihzia mipuiten an hre tawh hle tih a sawi.
C Lalremsiama chuan, “Lo thawk ho lo ta ila chu kan chereu tawh ngawt ang, tui hna tam tak hi a chhe tawh ngawt ang, he kan thawhdunna hian rah tha a chhuah chhoh zel pawh kan beisei,” a ti.
Central YMA president chuan PHE department chu thawhpui nuam tak leh an hmalakna hian rah tha a chhuah nia an hriat thu a sawi.
Vanlalruata chuan, “Tuihna humhalh vei nachang la hre lote kan tihharh zel a ngai a, kan tanrual hi a ngai khawp mai,” a ti a, fai leh thianghlimna kawngah pawh tan lak zel a tul thu leh Aizawl bikah phei chuan tan lak nasat a tul hle tih a sawi.
PHE Department leh Central YMA hian tuihna humhalh leh a awmsa tihpun kawngah kum 2012 leh 2017 chhung khan thawhdunna an lo ziak tawh a, hei a zawh hnuah kum 2017-2021 chhung thawhdunna nei chhunzawm lehin, hei hi a lo zawh leh tak hnuah kum 2021-2025 chhung atan thawdunna thu an thlung leh ta a ni.
Fai leh thianghlimna kawngah pawh kum 2017-2021 chhungin thawhdunna an lo nei tawh a, hei a zawh hnuah kum 2021-2025 chhung atana chhunzawm turin thawhdunna tur thu an thlung leh ta a ni.