Tuikukte hruai dodal turin YMA duty dawn


Tuirial bial MLA bye-election neih turah Tirpura-a awm mek Tuikukte vote thlak tura hruai emaw, an tana ruahmanna bik siam emaw dodal turin YMA an duty dawn.
Tripura-a awm tawh Tuikuk zingah Mizoram electoral roll-a vote la nei eng emaw zat an awm a, chung zinga mi 655-ten Turial bial chhung, Hortoki Booth II-ah leh Zodin Polling Station-ah vote an nei a, heng mite vote thlakna tur a bika ruahman siamsak leh vote an thlak theih nana Tripura atanga Mizorama hruai chu Central YMA-in a duh lo a, hemi kawnga hmalakna awmte chu dodal zel an tum.
The Zozam Times zawhna chhangin Central YMA General Secreatary Prof Lalnuntluanga chuan Tuikukte hian vote an thlak duh a niha anmahni sensoa vote an neihna hmun hi an pan a nih chuan sawisel an nei lo tih sawiin, chutihrual erawh chuan political party zingah an vote it avanga Tripura atanga zuk hruai an awm erawh an duh lo tiin, hetianga tilui an awm loh nan Tuikukte vote neihna polling station pahnihah Kolasib Sub Headquarter YMA-te an duty dawn tih a sawi.
Prof Lalnuntluanga chuan Tripura leh Mizoram inrina Kanhmunah pawh Mamit Sub headquarter YMA an lo duty dawn tih a sawi a, Tuikuk vote thlak tur hruai an awm chuan an lo dang dawn tih a sawi.
Hetihlai hian tun dinhmunah erawh political party zingah Tuikukte vote thlak tura hruai luih tum an la hriat loh thu a sawi a, “Tuikuk phurh khawm tum thawm a awm kan la hre lo a; mahse, boruak kan ngaichang ang a, Central YMA hruaitu lam pawh inthlanna hmuna tlan thla thei turin kan inring sa reng tawh,” a ti.
Tar lan tawh thin angin, Tripura-a awm tawh Tuikuk mi 655-in Turial bial chhungah hian vote an nei a, Mizoram Election department hotute chuan Tuikukte chu an awmna polling station ngeia vote thlak turin ECI an lo ngen tawh a. Political party-te chu Tuikukte vote an thlakna tura an kalna senso ngaihtuahsak lo turin a lo ngen tawh bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427