Hri kai zat a tlahniam zel; tha thlah lovin sorkar kal zel se
Kan boruak a ziaawm chho zel a, hrikai zat pawh tuktin a hniam lam zel a ni ta rih mai. Sang bi a kai lo chho ta zel bawk a, mitinin fimkhurna kan zawmtha niin a lang a, chhunzawm zel pawh a tha hle.
Hetih lai hian kan inthlahdah phah ang tih erawh hlauhawm tak a ni. Sorkar in hmai/hmui tuam campaign a hman mek pawh kan zawm tha hlawm hle niin a lang a, hei hian kawng tam takin kan dinhmun a titha ni pawhin a hriat.
Mitin kan fimkhur zual sauh sauh a tul a, hri leng kara la awm reng kan ni tih hi kan inhriatreng a tul hle. Hri hian kian mai a tumin a lang lo a, chutiang a nih vang tak chuan kan la fimkhur zual sauh sauh a, dan zawm tur hrang hrangte kan la zawm that viau rih pawh a tul hle mai.
Hmui/hmai tuam leh inkaihhhruaina hrang hrang, mipuiin kan zawm turte hi sorkar in a khat tawkin inhriattirna siam reng se la, hri leng kian hun tur a hriat miau loh avangin postar tar leh a khat tawka local cable TV lama pek ni ngawt lo deuh, mipui nawlpui hnen thleng phak tura inzirtirna hi nei reng bawk teh se.
Mipuite hi thuawih leh zawm thiam, kaihhruai nuam tak kan ni a, a pawng a puia hri darh chhana puh ngawt zel loh hi zir chungin, insiamthatna leh inherrem a ngaihna apiangah insiamremin, inherrem zel se la, thurawn lak kawngah pawh a tha zawk hman zui kawngah thangharh thar zel se la, chu chu sorkar tha zia pawh a ni.
Hmui/hmai tuam inzirtirna hun bik kan lo hmang zo a nih pawhin a thatzia inzirtirna lam hawiin kal zel tho se, hri kai zat tlakhniam zel theih nan tha thlah lovin sorkar la kal zel bawk mawlh rawh se.