Inter Milan : Martinez-a contract thar, Eriksen an chhuahtir dawn

Inter Milan chuan an striker ngaihven hlawh tak Lautaro Martinez chu an club a khel chhunzawm zel turin a hma hun an thlung nghet a, kum nga contract thar an ziahpui.

Kum 24 mi hi Premier League club zingah Arsenal leh Tottenham te nen sawizawm a ni fova, Spanish club Atletico Madrid pawhin an ngaihven ngawrh thin hle.

Mahse San Siro-ah cham zel turin a club in an hmin thei a, June 2026 thleng daih contract ziakin a contract hmasa a Euro maktaduai 111 a leichhuah theihna awm chu a contract tharah hian a tel tawh lova. Hemi vang hian tunah chuan leichhuah tum club hnen atangin Inter hian an hralh dawn a nih chuan an duh ang zat tak a manah an phut thei tawh dawn tihna a ni.

Argentine international hian social media kaltlangin contract thar a ziah thu hi a puang a. Kum thum a lo cham tawhna club tantute hnenah lawmthu a sawi tel. “Inter a contract ka ziah belh thei hi ka hlim a, he kawr ha chunga vawiin thleng ka lo tih tawh thin angin ka theihtawp ka chhuah zel ang.”

“Khelmual chhunga ka teammate-te hnenah ka lawm a, ka chhungte chungah ka lawm a, min tantu Inter fans zawng zawng chungah in mi thlawp tlatna ka hmuh thin avangin ka lawm.” tiin a sawi tel bawk.

Martinez hian an ram club Racing Club atanga Inter Milan a zawm hnu hian Nerazzurri tan vawi 144 a inkhel tawh a, goal 54 khungin midang khung tur vawi 21 a siamsak tawh bawk a, season liamta a Romelu Lukaku nen an inkawp chu Inter ralthuam hlauhawm a tling.

Eriksen an hralh dawn
Serie A champion lai in an attacking midfielder Christian Eriksen chu Italy-ah a inkhelh chhunzawm theih dawn loh avangin football chawlhsan lova a inkhelh chhunzawm theih nan ram dang club hnenah an chhuahtir tur thu an sawi.

Denmark international hi Euro 2020 a Finland nena an inkhelh tumin a lung lam tha lo avangin a tlu a. A taksaah defibrillator vuah mek a ni. Italy a infiamna kalpui danah hetiang khawl hmang chungin infiammite inel phalsak an ni lova, hei vang hian Eriksen pawh hi Serie A-ah a inkhel chhunzawm thei tawh lo.

Inter chuan an sum dinhmun an tarlannaah, “Eriksen ziah luh chungchangah hian June 2021 a European Championship-ah a inhliam hnuah Italy a hriselna lam thuneitute dan hmanlai avangin tun season-ah a inkhel thei lo. Player hi tun dinhmunah Italy a inkhel turin dan in a phal dawn lova, mahse ram dangah erawh a inkhel leh thei tawh dawn a ni.” tiin an sawi.

Kum 29 mi Eriksen hian nikum January thla khan Tottenham Hotspur atangin Inter Milan hi a zawm a, an tan vawi 60 inkhel tawhin goal 8 a khung tawh. San Siro-ah hian kum 2024 thleng contract a la nei a. A contract neih hlutzawng hi tun nipui atanga tehin Pound maktaduai 15 vel a la ni.

Tunah hian Spanish club Real Madrid leh a club hlui Ajax Amsterdam te nen sawizawm a ni mek.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427